Uhinak zabalduz
Aurten, eragin eremua zabaldu dute, eta Bizkaiko Golko osoari begira jarriko zaio klima aldaketaren gaineko kongresua, Galiziatik hasi eta Bretainaraino.
Datorren irailaren 27 eta 28an egingo dute Uhinak kongresua, Ficoban, Azti-Tecnaliarekin elkarlanean. Joan den urtean egin zuten estreinakoz klima aldaketa eta itsasertzaren gaineko topaketa hori, eta esperotako emaitzak lortu zituztenez, aurten berriro errepikatzea erabaki dute. Aurten, ordea, eragin eremua zabaldu dute, eta Bizkaiko Golko osoari begira jarriko zaio, Galiziatik hasi eta Bretainaraino. Guztira, 30 aditu eta profesionalek hartuko dute hitza.
Aurten berriro errepikatzeko arrazoi nagusienetako bat lehengo urtean utzi zituen sentsazio onak izan dira. Ander Sarratea Ficobako gerenteak adierazi duenez, iaz galdeketa bat egin zuten kongresuaren ondoren, parte hartu zuten 140 pertsonen artean, eta horren arabera, partaideen %84k balorazio ona edo oso ona egin zuen, eta %97tik berriro bueltatzeko asmoa agertu zuen.
Antolakuntza aldetik ere berritasunak ekarriko ditu bigarren aldiak. Hala, Monica Aldai Uhinak-eko zuzendariaren arabera, batzorde tekniko bat eratuko dute, eta bertan, administrazio publikoak, erakundeak, ikerketa zentroak eta arlo hori lantzen duten elkarteak ordezkatuta egongo dira.
Irekiera hitzaldia Rafael Sarda CSICeko zientzialariak emango du. Sardaren proposamen nagusia kostaldeko garapen ekonomikoaren onurak eta giza erabileraren eta haren babesaren zainketaren eta lehengoratzearen onuraren arteko oreka bilatzea da.
Edonola ere, kongresuak iazko egitura mantendu nahi izan dutela azaldu du Adolfo Uriarte Azti Tecnaliako zuzendariak. Lau multzo nagusi izango ditu. Klima aldaketaren erronkak gure kostaldean, Klima aldaketaren eraginak eta egokitzapena, muturreko gertaerak, eta kudeaketarako tresnak eta laguntza izango da. Azken horri lotuta, garrantzitsutzat jo du gizarteari modu egokian ematea klima aldaketaren gaineko informazioa. “Egun, komunikazio gutxi dagoela uste dugu, eta nahiko dramatikoa. Klima aldaketa dramatikoa izan daiteke, baina denbora eta gaitasuna badugu egokitzeko, neurriak ahalik eta lasterren hartzen baditugu”, ondorioztatu du Uriartek.
Uhinak kongresuaren aurkezpena.
