Erromatar zaporea ere eramango dute Dies Oiassonisera
Uztailaren 15etik 17ra Dies Oiassonis jaialdi erromatarra egingo dute, eta Irun Dastaturen eskutik hainbat ekitaldi egingo dituzte.
Uztailaren 15etik 17ra Dies Oiassonis jaialdi erromatarra egingo dute, Irunen. Bi egunez 2000 urte atzera egingo du Irunek, eta garai hartako zaporeak ere birsortuko dituzte, Irun Dastaturen eskutik.
Batetik, erromatar pintxoaren ibilbidea egingo dute, Santiago auzoan, Zabaltza aldean eta San Juan-Alde Zaharra inguruko taberna eta jatetxetan aurkitu ahal izango dira. Bakoitzak erromatar osagaiekin egindako pintxo berezi bat prestatuko du, eta bakoitzak 1,50 euroko prezioa izango du. Uztailaren 8an hasi eta uztailaren 17ra arte egongo dira pintxoak probatzeko moduan.
Bestetik, duela 2000 urteko errezeten trikimailuak ezagutzeko aukera izango da hiriko sukaldari eta ostalari ezagunen eskutik. Tailer bereziak izango dira, doan, eta hala nola, erromatar menu bat egiten edo ogia prestatzen ikasi ahal izango da.
Azkenik erromatar gourmet afari bat egingo dute, hilaren 16an (larunbata) museoaren kanpoaldean. Txartelak 20 euroan erosi ahal izango dira, Luis Marianoko turismo bulegoan.
Erromatar zirkua
Dies Oiassonisen aurtengo berritasun handia erromatar zirku baten erreproduzioa izango da. Lau ikuskizun eskainiko dituzte, hilaren 15etik 17ra. Sarrerak 5 euro balio du, eta Luis Marianoko turismo bulegoan erosi ahal izango dira.
Haurrentzat ere tailerrak antolatu dituzte.
