Ireki dute jaietako lehiaketetara lanak aurkezteko epea
Hasi da 2016ko Hondarribiko Jaiak iragarriko dituen kartela aukeratzeko bidea.
Dagoeneko irekita dago Hondarribiko jaietako kartel eta argazki lehiaketetara lanak aurkezteko epea. Hilaren 18a baino lehen aurkeztu behar dira lanak, BAZ bulegoan. Udan, astelehenetik ostiralera irekitzen dute bulegoa, 09:00etatik 13:30era.
Kartelean honako leloa adierazi behar da nahitaez: Hondarribiko Jaiak 2016ko iraila. Irabazleak 650 euro lortuko ditu, eta beste bi sari banatuko ditu udalak, 300 euro bigarrenarentzat, eta 200 hirugarren geratzen denarentzat.
Ohi bezala, kartelak bertikala izan behar du eta 70×50 zentimetro neurtu. Nahi den teknika baliatu daiteke, baina lanek orijinalak izan behar dute, aurretik argitaratu gabeak. Eta ez zaie markorik jarri behar, hori antolatzaileen lana baita.
Lau argazki gehienez
Jaiei begira Hondarribiko Kultura arloak antolatzen duen beste lehiaketa, argazkiena da. Lehiaketan parte hartu nahi duenak gehienez lau argazki aurkeztu ditzake, argitaratu gabeak denak. Hiru sari banatuko dituzte, 500, 400 eta 300 eurokoak.
Iazko kartelaren egileak, Kalixa Silanes zinegotziarekin
