Ez dute sexu eraso gehiago nahi
Esku artean duten informazioarekin protesta ekitaldia egiteko nahikoa arrazoi dutela esan dute TASetik.
TAS Txingudi Anti Sexistak deituta, elkarretaratzea egin zuten atzo iluntzean, Zabaltza plazan, Indarkeria sexistarik ez lelopean.
Ibarran emakume batek bere gogoz kontra drogatu zutela, eta ordu batzuetara auto baten barruan esnatu zela salatu du. Ekintza hori nahikoa izan da TASek ohiko protokoloa martxan jartzeko, baina horri Bidasoako Ospitalean drogen menpe artatu zituzten lau nesken gaineko “zurrumurrua” batu behar zaio. TASetik esan dute informazio askorik ez daukatela, baina ospitaleko iturrietatik jakin badakitela eraso horiek izan direla. Gaineratu dute beste komunikabide batek atzo bertan argitaratu zuela Ertzaintza gertakaria ikertzen ari dela.
Ertzaintzaren iturriek HITZAri birritan baieztatu dute ez eurek ezta Udaltzaingoak ere ez dutela salaketarik jaso.
Edonola ere, esku artean duten informazioarekin protesta ekitaldia egiteko nahikoa arrazoi dutela esan dute TASetik: “Begibistakoa da eta agerikoa festen gainean gehiegikeria eta erasoak gertatzen direla emakumeen kontra. Ez diogu festak gozatzeari utziko inolaz ere, gure lagun gizonen eskubide bera dugunean”.
Zabaltza plazan salatu dituzte azken erasoak.
