Kantabriarrak ordezkatuko du Fernando Bolea Bidasoan. Azken hiru urteak Villa de Aranda zuzentzen aritu da Jacobo Cuetara.

Jacobo Cuetara, Ademar Leon taldean egon zen garaian
Jacobo Cuetara kantabriarra izango da Bidasoa eskubaloi taldeko entrenatzaile berria. Irungo klubak jakinarazi duenez, azken hiru urtetan Villa de Arandako entrenatzaile izandakoak bi urteko kontratua sinatu du Bidasoarekin. Cuetara pozik azaldu da Bidasoarekin akordioa sinatu ondoren, eta datorren denboraldiko helburua Asobalen mantentzea izango dela argitu du: “Ilusio handia eragiten didan proiektua da, klubak historia handia duelako, duen zalegoa duelako, eta Bidasoak eskaintzen dizkidan aukerengatik. Erronka garrantzitsua da, helburua Asobalen mantentzea, baina pixkanaka-pixkanaka beste helburu batzuk lortu nahi ditugu”.
Villa de Aranda taldetik dator Cuetara. Burgosko talde apalarekin debutatu zuen Asobalen orain hiru urte eta azken denboraldian maila oso ona eman du: “Azken unera arte Europako postuen borrokan izan gara, Asobaleko aurrekontu baxuenetako bat izan arren”.
Asobalen hiru urtez bakarrik egon arren, eskarmentu handiko teknikoa da, Ademar Leon taldeko garai distiratsuenak bizitu zituelako. Ademar Leonen hamabi urtez egon zen Ribadesellako teknikoa, zazpi bigarren entrenatzaile eta prestatzaile fisiko bezala eta beste bostak harrobiko arduradun gisa. Leonen, egungo Espainiako hautatzaile den Manolo Cadenasen, Jordi Ribera Brasilgo selekzionatzailearen eta Espainiako gazteen selekzioko arduradun Isidoro Martinezen ondoan lan egin zuen.
Datorren urtean bere aginduetara izango dituen jokalarietako bat ezagutzen du jada, Markel Beltza, Ademarren ezagutu zuelako eta Villa Arandan bere jokalaria izan zelako.