Hondarribiko bidegorri sarea Irunekin lotu nahi du Abotsanitzek
Bilera irekia egingo dute ostiral arratsaldean Amute-Kostan, ideiak biltzeko.
Hondarribiko bidegorri sarea Mendelura luzatu eta Irungo sarearekin lotu nahi du Abotsanitz alderdiak. Horretarako bilera irekiak antolatuko ditu herrian, lotura hori nola egin daitekeen herritarrekin eztabaidatzeko: “Mugikortasunaren ikuspuntutik abiatutako bide gorri sare egoki bat behar dugu Hondarribian, herriaren eta herritarren beharrei erantzungo dion sare bat”, adierazi du Anjel Alkain Abotsanitzeko kideak. Lehen bilera bihar, ostiralez, egingo dute, Amute-Kostako Auzo Elkartearen egoitzan, 19:00etan.
Alkainen ustez, bidegorriaren erabilera ez da aisialdira mugatu behar eta zentzu horretan, Amute-Mendelura zabaltzea ezinbestekoa dela iritzi du: “Amute-Mendeluko eremua gure eskualdearen lotura da, Irungo erdi gunera bideratzen gaituena eta garraio azpiegituretara ere bai. Bide-gorri sarea aisialdirako ez ezik, egunerokotasunerako erabilera praktiko eta seguruan bilakatu behar dugu. Errepide segurtasuna bermatu eta lanerako joan etorria eremua izan behar du”.
Amute-Kostako Auzo Elkartean herritarren iritziak eta ideiak jaso nahi dituzte, eta datozen asteetan beste auzoetan egingo dituzte bilerak. Horrez gain, eskuorriak banatuko dituzte etxez etxe. Bidegorria luzatzearen aldeko kanpaina informatiboa hilaren 18an itxiko du Abotsanitzek; bizikleta martxa bat antolatuko dute egun horretarako.
