Urte erdi geroago, Stradivarias

Azaroan ziren etortzekoak, baina bertan behera geratu zen emanaldia. Larunbatean taularatuko dute Stradivarias ikuskizuna Itsas Etxean.

Asier Perez-Karkamo

Hondarribia

2016/04/20

Hiru emakume eta gizon bat, lau diva dira Stradivarias

Lau diva, sokazko musika tresnen lau musikari birtuoso, horiek dira Stradivarias, larunbat arratsean Itsas Etxea Auditoriumera antzerkia, musika eta umorea uztartzen dituen emanaldi entzutetsua eramango dutenak. 20:00etan hasiko da ikuskizuna eta dagoeneko sarrerak salgai daude 12 euroan. Arma Plazako turismo bulegoan eros daitezke ostirala arte, edo Interneten; larunbatean Itsas Etxeko leihatilan jarriko dituzte salgai, emanaldia hasi baino bi ordu lehenagotik. Iazko azaroaren 21erako zegoen Stradivarias 2 ikuskizuna programatuta baina, taldeko kide baten gaixotasuna medio, emanaldia bertan behera geratu zen. Udalak dirua itzuli zien sarrera erosita zutenei, eta 2016an berriro ekartzeko asmoa azaldu zuen. Hala, itzuli dira lau divak, eta umore, musika eta ezustekoz beteriko saioa eskaintzeko datoz. Iaz bigarren ikuskizuna aurkeztu zutenean Madrilen hainbat astez aritu ziren sarrerak agortzen. Gertuago, Donostiako Musika Hamabostaldian saio nabarmenena eskaini zuten. “Herri musika eta musika klasikoa jendearen esku jartzen du, umeentzat ere erakargarria da, eta kontzertu soila gaitasun lehiaketa bihurtzen dute, emozioz eta barrez jositako emanaldia”, azaldu du udalak. Lau diva, nor baino divagoa, jeloskorrak, seduktoreak, birtuosoak. Isaac M. Pulet (biolina), Melisa Castillo (biola), Irene Rouco (biolontxelo) eta Inma Pastor (kontrabaxua) dira Stradivarias, hiru emakume eta gizon bat, indar handiko lau emakume musikari eszenatokian. Bigarren proiektua 2013an sortu zen Stradivarias proiektua, eta arrakasta ikusita, bigarren ikuskizuna prestatu zuten iaz, lehena baino modernoagoa. Hala, Itsas Etxean hainbat estiloetako musikak interpretatuko dituzte, estiloak nahastuz —Schubert eta Police, Beethoven eta Stevie Wonder, Rossini eta Queen, Pergolesi eta The Platters—, musika hori beti umorezko kontakizunaren barruan kokatuz: “Emanaldi berean kopla eta bluesa, rocka eta soula, barrokoa eta popa: eta horrez gain abestu, dantza egin eta publikoa liluratu egingo dute, trikimailu abilekin eta gaitasun musikal harrigarriekin”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.