Txirrindularitzaren txanda, Igande Sasoin
Igande honetan Irungo Txirrindularitza Taldearen eskutik, hainbat ekintza izango dira haur zein helduentzat erdigunean.
Igande honetan Irun Sasoi bueltatuko da. Haurrei begirako egitasmoa da, eta hilean behin kirol ekintza bat egiten dute Irungo kaleetan, hiriko kirol talde baten eskutik. Oraingo honetan, txirrindularitzaren txanda izango da, eta Irungo Txirrindularitza Taldeak emango du.
Hainbat ekintza egingo dituzte Colon pasealekuan, 11:30ean hasita. Horrez gain, antolatzaileek bi lasterketa proposatu dituzte Kimu eta eta Haur mailetako umeentzat. Kimuei dagokiena 12:00etan abiatuko da, 6 kilometrotakoa, eta haurrei, berriz, 12:15ean eta 15 kilometrokoa izango da.
Ekintza gehiago ere izango dira, eta Zabaltza plazan ginkana egingo dute, haur nahiz helduei zuzenduta, 11:00etatik 12:00etara.
Hori dela eta, trafikoa moztu egingo dute Colon pasealekua, 10:30etik aurrera, Gipuzkoa hiribidea eta Francisco Gainza kaleen artean, bi norabideetan. 11:00etan, berriz, Colon pasealekua erabat moztuta geratuko da lasterketak direla eta. Garraio publikoa ohi bezala ibiliko da, baina 1 eta 2 lineen erdialdeko paradak kenduko dituzte.
Colon pasealekua itxiko dute trafikoarentzat. (Argazkia: www.surfingtheplanet.com)
