Orain arte, protokolo hori martxan jartzen zen tenperatura 5 gradutik beherakoa zenean, eta aurten 8 gradura igo dute gehienezko tenperatura.
Sergio Corchon eta Lourdes Larraza hotzaren protokoloaren aurkezpenean.
Joan den astetik martxan dago hotz handia egingo duela aurreikusten den egoeretan etxerik gabeko pertsonak hartzeko zerbitzua Irunen. Zerbitzu hori eskatzen dutenei edari beroa, logela eta gosaria eskainiko zaie hiriko zenbait hoteletan.
Aurten zerbitzu hori “indartu” egin dutela azaldu du Sergio Corchon Gizarte Ongizate delegatuak. Orain arte, protokolo hori martxan jartzen zen tenperatura 5 gradutik beherakoa zenean, eta aurten 8 gradura igo dute gehienezko tenperatura. Protokolo hori martxan egungo da ziur, egunotan, oso gau hotzak espero direlako.
Euskalmetek egiten duen iragarpenarekin lan egingo dutela azaldu du Lourdes Larraza Udaltzaingoaren ordezkariak. Hala, 8 gradu edo hortik behera jaitsiko dela aurreikusten bada, protokoloa martxan jarriko dute. “Hala ere, aurreikuspenak okerrak badira ere, gauean zehar tenperatura 8 gradutik behera jaisten bada protokoloa aktibatuko litzateke”, gaineratu du. Protokoloa martxan jartzeko baldintza tenperatura baldin bada ere, osasun baldintzak ere kontuan hartuko dituztela zehaztu du Udaltzaingoaren ordezkariak.
Iaz 25 eskaera
Joan den urtean 25 lagunek eskatu zuten zerbitzu hori. Corchonen arabera, 2014an egindako ikerketa baten arabera, 39 lagunek egiten zuten kalean lo Irunen. Hala ere, gaineratu du ez dela erraza jakitea zenbat lagunek egiten duten lo kalean, zenbakia aldakorra izatearekin batera, “ikuspegia” begiratu behar delako Corchonen iritziz, “kalean lo egitea zer kontsideratzen den”.
SPIren kritikak jasan dituena, eskatzaileek Udaltzaingora jo behar izatea da, eta eurek lagunduta joan behar izatea lo egingo duten tokira. Larrazaren iritziz, 2005an zerbitzua martxan jarri zenetik egin da horrela, eta “horren bidez ez da ez kriminalizatu nahi ezta pertsona horienganako errespetua ere galdu nahi. Udaltzaingoa ere arazo honekin sentsibilizatua dago”, ondorioztatu du.
Corchonek gaineratu du udaltzainek lagunduta joatearena, gainera, ostalariek egindako eskaera dela: “Horrek lagundu du 2005etik arazorik ez egotea, eta deigarria da, badaudelako perfil batzuk portaera arazoekin. Ez dugu ahaztu behar”.
“Baliabide aldetik oso ondo dago Irun”
SPIren kritikak jaso dituen bigarren arloa, behin-behinekotasuna da. Hala, Corchonek onartu du zerbitzu batzuk martxan jarri eta garatu behar dituztela (“Hondarribiarekin batera, errepikatzen dut”), baina Eusko Jaurlaritzak eskatzen duen Kartera Dekretua kontuan hartuta, Irun baliabide aldetik “oso ondo” dagoela esan du.
Kartera dekretu horren arabera, 2017a baino lehen kartera dekretuak zehazten dituen zerbitzuen %80 egon beharko dute martxan, eta 2020a baino lehen %85. Edonola ere, legezko betebeharra %80 edo %85ekoa izan arren, udalaren borondatea helburua hori gainditzea dela jakinarazi du Gizarte Ongizate ordezkariak. Hala, aurrekontuen zirriborroan diru sarrera bat bilduta dagoela esan du proiektuaren ikerketa eta idazketa egiteko.
