Hondarribiak ez du hutsik egin Mendibeltzen
Hurrengo partida etxean jokatuko dute berdeek, liderraren kontra.
Orioko Mendibeltz zelaian Getariako Ketaren aurka irabazita (0-3), zalantzak uxatu ditu Hondarribia Futbol Elkarteko lehen taldeak. Urteko lehen garaipena izan da Ohorezko Mailako taldearentzat, aurreko sei partidetatik bi galdu eta beste laurak berdinduta zituelako; abenduaren 20tik ez zuten hondarribiarrek partida bat irabazten.
Bolada txarra eten eta arnasa hartu dute Mikel Llorenteren mutilek. Sailkapenean hamargarren kokatu dira, zazpigarren postutik puntu bakar batera, eta jaitsiera postuetatik oso urruti (ikusi sailkapena). Keta taldea, berriz, zulora itzuli da, jardunaldia hasi aurretik azken postuan zegoen Ordiziak aurreratu baitu, etxean Ostadar menderatuta.
Hurrengo asteburuan Tolosa liderraren kontra jokatuko du Hondarribia futbol taldeak, Hondartzan. Hirugarren Mailara igotzeko faborito nagusia da Tolosa, baina hondarribiarrek ez dizkiote gauzak erraz jarriko. Lehen itzuliko partidan ozta-ozta nagusitu ziren tolosarrak, luzapenean. Gainera, multzoko talde indartsuenen kontra oso partida onak egin izan dituzte berdeek. 
