"Horrelako gertakariak salatu behar dira"
TAS Txingudi Anti Sexistak deituta, hainbat herritarrek salatu dute ustez adin txikiko bati egindako sexu erasoa.
Joan den igandean gizon bat atxilotu zuten Irunen, adin txikiko bati sexu abusuak egitea egotzita. Atzo, hainbat herritar kalera irten ziren gertakaria salatzera: Zabaltza plazan bildu ziren iluntzean, TAS Txingudi Anti Sexistak deituta.
TASek gogorarazi zuen eraso sexistak egunero izaten direla, eta jendeak pentsatu baino hurbilago daudela. Zentzu horretan, edonon gertatzen direla ere, ezin direla gaitzetsi gabe utzi gaineratu zuen: “Horrelako gertakariak salatu egin behar dira”. TAS, hain zuzen, halako erasoak arbuiatu eta herritarrak mobilizatzeko sortu zela azaldu zuen. Horrez gain, erakundeei “benetako konpromisoa” eskatu zien, indarkeria matxista errotik ezabatzeko.
Duela bi aste atxilotu zuten gizona. TASek azaldu duenez, ustez 13 urteko neska bati sexu abusuak egin zizkion, eta horrez gain, kamera bat jarri zuen bere gelan, zelatatzeko. Amaren bikotekidea zen.
Horrekin lotuta, Gasteizen hil zuten 17 hilabeteko haurraren gertakaria ere gogora ekarri zuen talde feministak.
Ustez adin txikiko bati egindako sexu erasoa salatzeko elkarretaratzea egin dute Zabaltza plazan TASek deituta.
Erlazionatutako edukiaGizon bat atxilotu dute Irunen adin txikiko bati sexu erasoa egitea egotzita
