EH Bilduk osoko zuzenketa eta hemezortzi zuzenketa partzial aurkeztuko dizkie 2016ko aurrekontuei. Hiru berri proposatu ditu.
Irungo EH Bilduko hautetsiak: Izaskun Sorondo, Oinatz Mitxelena eta Jokin Melida.
Datorren astean aterako da bozketara 2016ko aurrekontu proposamena, eta
oposizioko taldeek ostirala baino lehen egin behar dituzte euren zuzenketak. EH Bilduk berretsi du osoko zuzenketa aurkeztuko diola udalaren aurrekontu proposamenari, eta horrez gain,
aurretik egindako hamabost zuzenketa partzialei beste hiru gaineratu dizkio. Horietako bat da udalak
Mendibil zinemak erostea.
Udal aurrekontuetan partida bat sortzeko eskatu du EH Bilduk. “Irun bezalako hiri bat erdigunean zinemarik gabe ezin daitekeela geratu uste dugu, gaineratu du udal taldeak.
Beste bi zuzenketa partzialei dagokionez, batetik, 2012ko 14. ordainsaria pagatzea eskatu du, oraindik sariaren erdia jasotzeke daude eta. Bestetik, berriz, hiru gizarte langile lanpostu sortzea proposatu du.
EH Bilduk udalari eskatu dio “hainbat eta hainbat eragile eta elkartek egindako kritikak entzungor” ez egiteko. Haatik, oinarrizko beharrei erantzuteko unea dela esan du, eta aurrekontu proiektuak ez diela horiei erantzuten. Hala, zuzenketa horien inguruan hitz egingo dute aste honetan Ogasun delegatuarekin duten bileran.
Herritarren egoerari erantzuten ez dioten aurrekontuak
EH Bilduren arabera, 2008an krisia lehertu zenetik udalak ez du jakin egoerari buelta emateko aurrekontuak aurkezten, eta aurtengo aurrekontuek ere ez diote erantzuten Irungo herritarrek pairatzen duten egoerari. Hala, azaroko langabezia datuak kezkagarritzat jo ditu (4.626 langabe, eta %15,5 langabezia tasa).
Bidasoa Bizirik-era urtero bideratutako diru kopurua (1,2 milioi euro) ez del nahikoa izan esan du, Irun eta Behe Bidasoak estrategia orokor bat behar dutela gaineratu du, ekonomian zein enpleguan.
Gizarte laguntzei dagokienez, berriz, eskaerak handitzen joan badira ere udal gobernuak egiten duen bakarra Eusko Jaurlaritzak aurreikusten duen diru kopurua edo aurreko urtean erabilitako jartzea dela adierazi du.
Azkenik etxebizitzarako eskubidea ere ez dela bermatzen iritzi dio udal taldeak: “69.783.000 euroko aurrekontutik, 200.000 euro (%0,28) bideratuko ditu alokairuzko etxebizitza bultzatzeko”.
