Ama Guadalupekoa Nazioarteko Judo Txapelketa egingo dute larunbatean Jostaldin. Kadeteen Espainiako Super Kopa izango da eta 554 kirolari eta entrenatzaile daude izena emanda.
Agirre, Veitia, Silanes eta Arrillaga, Super Kopako aurkezpenean
436 judoka, 291 mutil eta 145 neska, 118 entrenatzaile, eta dozenaka guraso eta lagun. Horiek guztiak hurbilduko dira asteburuan Hondarribira, Ama Guadalupekoa Judo Elkarteak 24.ez antolatu duen Kadete Mailako txapelketara. Jostaldi kiroldegian egingo dute larunbatean, 09:00etatik 18:00etara, eta aurten ere Espainiako Super Kopa izango da. Igandean ere izango da judoaz gozatzeko aukerarik, federazio askok bidaia baliatuko baitute elkarrekin
stage-a burutzeko.
Gaur goizean aurkeztu dute Ama Guadalupekoa Nazioarteko Judo Txapelketa. Arma Plaza kultur eta turismo gunean izan da ekitaldia eta bertan izan dira Kalisa Silanes Kirol zinegotzia, Manu Agirre Gipuzkoako Judo Federazioko kirol zuzendaria, Esteban Arrillaga Euskadikoaren ordezkaria eta Ama Guadalupekoa klubeko hainbat ordezkari, horien artean Ronaldo Veitia kirol arduraduna.
Mila pertsona inguru mugituko ditu aurten Super Kopak. Marka hautsi du kirolari kopuruari dagokionez, baita haien jatorriari begira. Espainiako Estatuko erkidego guztiek izango dute ordezkaritza, eta Portugal, Andorra eta, lehen aldiz Frantziako federazioek ere izena eman dute. Hori horrela, Silanesek “kirolari asko” hurbilduko direla nabarmendu du eta eskerrak eman dizkie Ama Guadalupekoa klubeko arduradunei, “lan handia” egiten dutelako: “Adin hauetan oso garrantzitsua da baloreetan hezitzea, eta judoak hori kontuan hartzen du. Ama Guadalupekoak lan handia egiten du zentzu horretan”.
Agirre izango da aurten ere txapelketako kirol zuzendaria. Bere hitzetan, “harrotzeko modukoa da Amak antolatzen duen txapelketa, eta erronka ere bada, eta hori gurasoei esker lortzen da, entrenamenduei, ilusioari eta klubak egiten dituen milaka eta milaka kilometroei esker”. Hamabostero nonbaiten Espainiako Kopa bat egiten dutela erantsi du Agirrek, “eta guztietan parte hartzen du Ama Guadalupekoak. Horren guztiaren emaitza da Hondarribiko Super Kopako parte hartze handia”.
Euskadiko Judo Federazioko ordezkariak, bere aldetik, balorean jarri du larunbateko txapelketaren kategoria: “Txapelketa batek Super Kopa maila lortzea ez da zaila, zaila dena da maila horri eustea, beste batzuek lortu nahi dutelako hori. Urtero egiten duten esfortzua ikaragarria da, beste Super Kopak federazioek antolatuak direlako, eta hau klub batek eramaten duelako aurrera”.
Dominak, oso zail
Hainbesteko parte hartzea izanik, dominen bat lortzea asko zailtzen da eta horren jakitun da Ronaldo Veitia Ama Guadalupekoako kirol arduraduna. Kadete mailako txapelketa da Hondarribikoa, eta entrenatzaile kubatarrak onartu duenez “presio handiegia da kirolarientzat”. Horregatik, kanpoan baino emaitza apalagoak izan ohi ditu Ama Guadalupekoak etxean, baina aurten horri buelta ematea espero du: “Espero dezagun aurten irribarre batekin irtetea tatamitik”.
Ion Pascual eta Aitor Goikoetxea dira orain arteko torneoetan hoberen ibili diren hondarribiarrak, eta beraiek dira dominen saltsan ibiltzeko aukera gehien dituztenak. Orotara, zazpi ordezkari izango ditu klubak, izena emandako bederatzietatik bi mina hartuta daudelako.
