Xabi Taberna: "Inoiz ez dut ikusi Rion ikusi dudan pobrezia"

Besteak beste, Ander Elosegiren entrenatzailea da Xabi Taberna hondarribiarra. Azaroan Brasilen izan ziren kanal olinpiko berria probatzen. HITZAk elkarrizketa egin dio eta bihar argitaratuko du papereko edizioan.

Asier Perez-Karkamo

Hondarribia

2016/01/14

Taberna, Elosegiren saioa zuzentzen Bidasoa ibaiko San Migel eremuan

Xabi Taberna hondarribiarra Espainiako piraguismoko ur bizietako entrenatzaileetako bat da. Besteren artean, Ander Elosegi irundarrarekin ari da lanean eta berarekin laugarren bi postu lortu zituen Pekingo eta Londresko olinpiar jokoetan. Londresen inoizko emaitzarik onenak lortu zituen Tabernaren lan taldeak: Maialen Chorraut donostiarrak brontzezko domina lortu zuen K1ean, Elosegi laugarren geratu zen C1ean eta beste donostiar batek, Samuel Hernanzek, bosgarren tokia lortu zuen C1ean. Duela lau urteko jokoak bukatu zirenetik Rio baino ez dute buruan eta azaroan bertan izan ziren, olinpiar jokoetarako eraiki duten kanal berria probatzen. Bertan topatu zutena “hunkigarria” izan zela aitortu du Tabernak: “Iritsi bezain pronto, aireportutik atera eta bidean dena ziren favelak, izugarria da. Hoteletik ere gomendioa zen ez ateratzekoa, eta korrika hotel barruan egin behar genuen…”. Bihar, ostiralez, Xabi Tabernari eginiko elkarrizketa argitaratuko du Oarso Bidasoko HITZAk papereko edizioan. Rion ikusitakoaz, bere ibilbideaz, txikitatik piraguismoarekin duen zaletasunaz, eta Elosegik eta Gipuzkoako gainontzeko piraguistek olinpiar jokoetan lor dezaketenaz mintzatu da hondarribiarra.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.