Enbidorik ez Hondarribian
Gipuzkoako herri bakarra da orain arte Euskal Herriko Mus Txapelketako kanporaketarik antolatu ez duena.
Abian da Euskal Herriko VIII. Mus Txapelketa. Asteburu honetatik bertatik egingo dira herrietako kanporaketak zazpi probintzietan eta aurten ere Gipuzkoa izango da partaidetza handiena izango duena. Herrialdeko ia herri guztietan antolatu dira kanporaketak, denetan Hondarribian salbu.
Euskal Herriko Mus Federazioko kide den Xabier Albizuk HITZAri adierazi dionez, oraindik bada aukera Hondarribian kanporaketa antolatzeko, eta dei egin die herriko elkarte, taberna edo bestelako eragileei haiekin harremanetan jartzeko. “Behar duten laguntza osoa emango diegu”, azaldu du Albizuk.
Txapelketari buruzko informazio guztia (arauak, sariak, antolatzeko egin behar dena…) ehmus.eus webgunean aurkitu daiteke, baina zalantzak telefonoz argitzea nahiago duenak Albizurekin harremanetan jar daiteke, 688 65 15 75 zenbakian.
Irunen, Hazia elkarteak antolatu du VIII. Euskal Herriko Mus Txapelketako kanporaketa. Izena eman nahi duenak bertan egin dezake. Otsailaren 2an egingo dute. 
