Langabetu eta familia ugarientzat Hondartzako kuota murriztea eskatu du Abotsanitzek
Hondartza kiroldegia ixten duenean kuota ez kobratzea ere proposatu du. Hondarribia Lantzen erakundeko bileran aztertuko dute eskaera.
Hondartza kiroldegiko bazkide diren langabetu eta familia ugarirentzako deskontuak eskatu ditu Abotsanitz alderdiak. Gainera, irailean azpiegitura itxita egoten den hogei egunetako kuota ez kobratzea ere eskatu dute.
Azaroaren 11n Hondarribia Lantzen erakundearen bileran egin zuen eskaera Abotsanitzek, eta proposamen zehatza lantzeko eskatu zitzaion. Gaia landu eta proposamena berriro aurkeztu du, Hondarribia Lantzenen hurrengo bileran aztertu dezaten.
Langabetu eta familia ugarirentzat kiroldegi kuotako beherapenak eskatu ditu Hondarribiko Udaleko oposizioko talde nagusiak. Hala, langabetuentzako %50eko deskontua proposatu du, baldintza batekin: “Langabezian dagoen pertsona hilabetero bere zihurtagiria kiroldegian aurkeztu beharko du hobari honi atxikitzeko”.
Eta familia ugarientzat %25eko deskontua eskatu dute. “Dokumentazio gisa, famili liburua edo familia ugarien txartela aurkeztu beharko lukete”, argitu du Abotsanitz taldeak.
Gainera, irailean bazkide guztiei kuotaren bi heren baino ez kobratzeko galdegin du: “Iraileko geldialdi teknikoa dela eta, hilabete horretan kiroldegiaren zerbitzua hogei egunez eskeintzen da”, arrazoitu dute.
Hondartza kiroldegia
