Udal gobernu taldearen gardentasuna bultzatzeko neurriak "makillajetzat" jo ditu EH Bilduk

Gardentasuna hautetsien ondasunak eta curriculumak argitaratzera mugatzen ez dela uste du koalizioak. Egunerokoan praktikan jarri behar dela eskatu diote udal gobernu taldeari.

Bidasoko Hitza

Irun

2015/11/20

EH Bilduren udal taldeko hiru kideek egin dute agerraldia

Urriko ohiko plenoan hartutako gardentasun neurriak “makillajea” dela uste du EH Bilduk. Agerraldia egin dute gaur goizean udal taldeko hiru zinegotziek. Izan ere, plenoan adostutakoaren arabera, zinegotziek euren ondasunen berri eman behar dute udalaren webgunean, baita ere curriculumaren berri. Oinatz Mitxelena eledunak salatu duenez, neurri bakar hori hartzea “ez da gardentasuna. Harago joan behar da”. Jokin Melidaren arabera, bere taldeak eta udal gobernu taldeak ez dute gardentasunari buruzko iritzi bera. “Gardentasuna jokatzeko modu bat da, eta egunerokoan erakutsi behar, esparru guztietan”, adierazi du Melidak. Horrela, salatu du oposizioak “gobernuaren neurri asko komunikabideen berri” jasotzen dituela. Gainera, euren iritziz “gardentasun falta” duten proiektuak zerrendatu ditu: “Martindozenea ez dakigu noiz irekiko den, Palmera-Monteroko egoera, Plaiaundiko kirol instalazioak…”. “Txutxumutxu politikoak” Izaskun Sorondok “beste era bateko hausnarketa” bat egiteko eskatu die udal gobernu taldekoei. “Hartutako neurriak makillaje hutsa dira. Kargu politikoak ditugunon ondasunak eta curriculumak argitaratzen ez da ustelkeria ekiditen”, esan du Sorondok. Izan ere, ustelkeria ez dela diru sarreretara mugatzen aipatu du: “Adibidez, udalak obra bat enpresa bati esleitzen dio, eta horregatik, politikariaren semeari auto bat erosten diote. Non agertuko litzateke hori? Edo politikariari berari bidaia bat ordaintzea”. Beste era bateko neurriak eskatu dituzte, “ustelkeria konplexuagoa” delako. “Ongi dakite hori udal gobernu taldean”, gaineratu dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.