Tomas Elgorriaga: "Boteretsuek badakite herritarrongandik dariola indarra"
Alemaniatik Frantziara estraditatu duten Tomas Elgorriaga preso hondarribiarrak gutuna idatzi zien Tomas Etxera taldeak antolatuta asteburuan Friburgora autobus bidaia egin zuten hondarribiarrei.
Alemaniatik Frantziara estraditatu duten Tomas Elgorriaga preso hondarribiarrak gutuna idatzi zien Tomas Etxera taldeak antolatuta asteburuan Friburgora autobus bidaia egin zuten hondarribiarrei. Estraditatuko zutela jakin aurretik idatzi zuen testua, eta bertan, eskerrona azaltzeaz gain, askatasunaren eta elkartasunaren alde borrokatzen jarraitzeko beharra aipatzen du Elgorriagak: “Honela ezagutzen gaituzte, askatasuna eta elkartasunaren alde borrokatzen. Horregatik errespetatzen gaituzte”.
Hau da, oso-osorik, Tomas Elgorriagak Friburgora bidaia egin zutenei idatzitako testua:
“Lagun maiteok.
Gurasoek kontatu didate 40 lagun baino gehiago etorri nahi zenutela ni bisitatzera. Ikusten dudanez, oraindik ez duzue ahaztu honelako bidaiatxoak antolatzen, inoiz baino bidai luzeago gainera. Nork pentsatuko zukeen orduan, egunen batean ni ikustera antolatuko zenutela! Ematen du zertxobait ikasi dugula behintzat, azken 40 urteotan.
Baina bidai honek erakusten digu ere ez dugula amorerik ematen. Are gehiago, Europa osoan joan dira ikasten hori, ez dugula etsitzen. Maizegi topatu dugu guganako mesfidantza Europan. Lagun ezkertiarren aldetik, eta herri askeen aldeko lagunen aldetik. Batzuentzat ‘nazionalistak’ ginen, eta besteentzat ‘biolentoak’. Baina pasa ahala, gure borrokaren muina gelditu da agerian: herritar subiranoak garela, geure buruaren jabe, soziala gure herri barrura begira bultzatuz, eta elkartasuna munduko herri guztiei begira bultzatuz. Bertakoak ala etorkinak izan, boteretsuak ez digute gizarte askea onartzen. Uste dute dena “goitik” antolatua egon behar duela. Baina badakite, herritarrongandik dariola indarra eta askatasuna.
Hauxe da bazter guztietako jendearekin elkar ulertzeko oinarria, eta boteredunek horregatik isilarazten gaituzte. Zeren gu ezagutzen gaituztenek, honela ezagutzen gaituzte: askatasuna eta elkartasunaren alde borrokatzen. Horregatik errespetatzen gaituzte. Eta horregatik pozten naiz zuek hona, Freiburgera [Friburgo, alemanez], etorri izanak. Toki polita da, hiria eta ingurukoak irekiak dira, eta orain dela 160 urte Badeneko iraultza izan zen bertan, Prusiarrek gero zanpatu zutena.
Egun ederra pasako duzuelakoan, Euskal Herri sozialista eta feministaren bidean,
Gora Freiburg, gora Euskal Herri burujabea!
Tomas, Mannheim 2015-11-13″
Larunbateko kontzentrazioa, Friburgon
