Euskadi Basque Country Bandera ere, berdeen neurrikoa

Lehen bi edizioetan makal aritu izan ziren hondarribiarrak, baina III. Euskadi Basque Country Bandera irabazi dute Malagan. Lehen ekitaldian hamargarren geratu zen Ama Guadalupekoa eta iaz bosgarren.

Asier Perez-Karkamo

Hondarribia

2015/06/29

Hondarribiarrak, bandera jaso berritan

Iaz San Miguel ligan emandako erakustaldiaren ondoren Malagan irabazteko faboritoetako bat zen Hondarribia, baina atzora arte berdeek ez zekiten Euskadi Basque Country Banderan emaitza ona lortzea zer den. Bartzelonako lehen urtean zortzigarren izan ziren estreinako proban, eta lau jardunaldi behar izan zituzten postu on bat lortzeko. Bigarren jardunaldiko 10.a salbu, ligako postu txarrena izan zen —10. jardunaldian ere 8. geratu ziren Zumaian—. Hasieratik bertatik 2013 denboraldian lan irregularra burutu zuen Ama Guadalupekoak, baina bi bandera irabazita eta hamar aldiz lehen lauren artean geratu ondoren, laugarren bukatu zuen liga. Iaz bosgarren postuan bukatu zuen Hondarribiak II. Euskadi Basque Country Bandera, Bartzelonan ere. Denboraldiko postu txarrena izan zen hori berdeentzat, liga irabazita zutela azken jardunaldian Portugaleten eginiko postu bera. Bi estropada horietan eta Zumaian ezik —laugarren postua lortu zuen—, gainontzeko proba guztietan lehen hiruren artean sailkatu zen traineru berdea, zazpi bandera irabazita. Aurten, baina, Hondarribia Arraun Elkarteak ezin hobeto hasi du San Miguel Liga, lehen bandera astinduz. Erregulartasunaren txapelketa oso luzea da, eta ikusteko dago hemendik aurrera zer gertatuko den, baina liga irabazteko faboritoen artean, Orbañanosen mutilak dira Malagako infernutik freskoen itzuli direnak eta lehen aldiz, jaurlaritzaren banderako itzulera aurpegi onarekin egin ahal izan dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.