Zinegotzi kargua euskaraz hartu du Hondarribiko Udalbatza osoak
EAJ, Abotsanitz, EH Bildu, PSE-EE eta PP-ko ordezkariek, guztiek euskara hautatu zuten zinegotzi bezala dagozkien bete beharrak “zintzo” beteko dituztela jakinarazteko.
Euskara hutsean, hala hartu zuten larunbatean zinegotzi kargua 2015-2019 agintaldian Hondarribiko Udalbatza osatuko duten hamazazpi hautetsiek. EAJ, Abotsanitz, EH Bildu, PSE-EE eta PP-ko ordezkariek, guztiek euskara hautatu zuten zinegotzi bezala dagozkien bete beharrak “zintzo” beteko dituztela jakinarazteko.
Kargua hartzen lehena Txomin Sagarzazu izan zen, ordezkari gehien lortutako alderdiko burua izanik. Bideoan ageri den bezala, Txomin Sagarzazuk honako formula erabili zuen kargua hartzeko: “Hitz ematen dut zinegotzi karguari dagozkion bete beharrak zintzo beteko ditudala, estatuko arau nagusia den konstituzioari men eginez, legearen aginduz eta ezinbestean”.
Batzuek “zin egin” eta beste batzuek “hitz eman”, baina gehienek gerora alkate izendatuko zutenak erabilitako formula luze hori irakurri zuten. Jeltzaleen artean Maite Pelaez izan zen gidoitik atera zen bakarra. Paperik gabe hurbildu zen adineko mahaia osatzen zuten Josu Alvarez eta Maria Serranorengana eta haien galderari erantzunez, “bai, zin egiten dut” soil batekin hartu zuen kargua Pelaezek.
Zinegotzi kargua onartzeko esaldi luzeena Josemi Otxoteko popularrarena izan zen: “Zin egiten dut zinegotzi karguari dagozkion bete beharrak zintzo beteko ditudala, estatuko arau nagusia den konstituzioari men eginez, legearen aginduz eta ezinbestean, eta ebanjelioen gainean”.
Eta Abotsanitzeko hiru ordezkariek, “Euskal Herriak onartu ez duen Konstituzioari men eginez” eman zuten hitza.
Otxotekok ebanjelioak aipatu zituen
Erlazionatutako edukia[Argazki galeria] 10 gizon eta zazpi emakume Hondarribia gobernatzeko
