Oier Goikoetxeak (-60 kilo), Iker Otegik (-66), Lidia Yarzak (+78) eta Maialen Ramosek (-63), Caceresen egin den Espainiako Judo Kopako lehen proban parte hartu dute. Eta eraman zutena baino pisu gehiago ekarri dute maletetan, bi urrezko domina eta zilarrezko bat lortu baitituzte.
Gainontzeko kiroletan denboraldia bukatzen ari den bitartean, Ama Guadalupekoa Judo Taldeko gazteek denboraldi berriari hasiera eman diote asteburuan. Oier Goikoetxeak (-60 kilo), Iker Otegik (-66), Lidia Yarzak (+78) eta Maialen Ramosek (-63), Caceresen egin den Espainiako Kopako lehen proban parte hartu dute. Eta eraman zutena baino pisu gehiago ekarri dute maletetan, bi urrezko domina eta zilarrezko bat lortu baitituzte.
![Amajudo Judo Caceres](http://bidasoa.hitza.eus/site/files/2015/06/Amajudo-Judo-Caceres-300x187.jpg)
Gazteak podioan Veitia entrenatzailearekin
Oier Goikoetxeak lortu zuen hondarribiarren lehen domina, urrezkoa. Bigarren errondan hasi zuen txapelketa, eta erraz egin zuen aurrera. Finalerdietan, aldiz, azken segundoraino lehiatu behar izan zen Sergio Diaz madrildarra gainditzeko. Finalean beste madrildar bat zuen zain, Javier Peña. Atzetik hasi zen Goikoetxea, baina eskarmentu handia erakutsiz, markagailuari buelta eman zion eta urrezko domina jantzi zuen. “Bilakaera bikaina ari da erakusten, uneoro teknikoki eta taktikoki haziz doa. Horrela jarraituz gero, txapelketa asko irabaziko ditu”, adierazi du Ama Guadalupekoa klubak.
Lidia Yarzarentzat izan zen urrezko beste domina.
Espainiako txapeldunak erabateko nagusitasuna erakutsi zuen bere pisuan. Bitan igo zen tatamira eta bietan aise irabazi zuen, finalean Mirian Garcia galiziarra menderatuz. Klubetik hondarribiar gaztearen erakustaldia nabarmendu zuten: “Sekulako txapelketa egin du eta emaitza ezin hobea izan da, beste emaitza bikain bat bere ibilbidean. Argi dago Yarzak berak duela eskuetan noraino iritsi nahi duen erabakitzea”.
Klubeko beste neskak, Ramosek, debuta egin zuen maila berrian, orain arte kadeteekin lehiatu baita. Belauniko lesio larriaren ondoren,
min hartu aurretik erakutsiko dohainak berreskuratzen hasia da, eta txapelketa harrigarria egin zuen. Finalera iritsi zen Ramos, eta azken lehian Silvia Lage galiziarrarekin galdu zuen, zilarra lortuz.
Iker Otegik, bere aldetik, zorte txarra izan zuen zozketan, lehen errondan Espainiako azpi txapeldunaren kontra egokitu baitzitzaion, Ricardo Casasen kontra. Otegik borroka galdu zuen, baina azken unera arte aukerak izan zituen irabazteko. Lehen borroka galduta, txapelketatik kanpo geratu zen Otegi.