Arizaga, Agirregabiria. Iraola, Zabalo eta Agirre, liburuaren aurkezpenean
Jaizkibel mendiaren inguruko liburua eman du argitara Aranzadik. Atzo goizean aurkeztu zuten
Jaizkibel mendia: ondare naturalaren berrikusketa liburua, zientzia elkarteak Donostian duen egoitzan.
Aurkezpenean Aranzadiko idazkari nagusi Juantxo Agirre Mauleon eta liburuaren editore eta ornitologo Jaun Arizaga izan ziren, eta bi zientifikoak laguntzen, Gipuzkoako Foru Aldundiko Ingurumen eta Obra Hidraulikoen zuzendari Ainhoa Iraola, eta Lezoko eta Pasaiako alkateak, Ainhoa Zabalo eta Amaia Agirregabiria. Hondarribiko Udaleko ordezkaritza bat iragarrita zegoen, baina ez zen inor azaldu.
Liburua “mugarri historikotzat” jo zuen eta Arizagak erantsi zuen “ezbairik gabe Jaizkibelen gainean orain arte egin den lan zientifikorik osatuena” dela. Azken honek azaldu zuenez, hiru ataletan banatu dituzte argitaratutakoak: geologiari buruzkoak, itsas eremuaren gainekoak, eta lur eremuaren ingurukoak bereizi dituzte. Artikulu zientifikoez osatutako liburua dela azaldu zuen editoreak, “ikerlariek Jaizkibelen gainean ezagutzen dituzten guztien berrikusketa sakona”.
Guztira, 50 aditu inguruk hartu dute parte ikerlanean, auzolanean. Guztien ekarpena eskertu zuten atzo Aranzadiren egoitzan.
Itsas korridorea aldarri
Atzo aurkeztu zuten liburuak 2012n Jaizkibel inguruan Lezon egin ziren jardunaldiak ditu oinarri. Orduan hausnartutako guztien ondorio da argitalpena, “Jaizkibelen gaineko ezagutza sozializatzea” helburu. Izan ere, aldundiko ingurumen zuzendariak nabarmendu zuenez, “ezagutza eta ezagupenaren gizarteratzea, babesaren aurreko ezinbesteko urratsak dira”.
Ildo beretik, Ulia eta Jaizkibel arteko itsas korridorea babestea ezinbestekotzat jo zuen aldundiko arduradunak, eta Eusko Jaurlaritzari norabide horretan urratsak egin ditzala eskatu zion, “teorian defendatzen direnak, praktikara eramateko”.
Bide beretik, Lezoko alkateak antzeko egitasmoak babesten jarraitzeko konpromisoa bere gain hartu zuen eta anfibio eta narrastiekin egiten ari diren lana edota baratza parkearen egitasmoak goraipatu zituen.
Agirregabiriak, bere aldetik, Jaizkibelgo altxorrak babesten jarraitzeko eskatu zion Aranzadiri, Jaizkibel mehatxatutako eremua dela gogoraraziz.
