Herritarrek eta eragileek egindako 300dik gora ekarpen jaso ditu koalizioak; udal alderdiaren oinarri ideologikoekin bat zetozenak aintzat hartu dituzte.
Oinatz Mitxelena Irungo EH Bilduren bozeramaile eta alkategaia
EH Bilduren udal taldeak herritarren eta eragileen ekarpenak jasotzeko prozesuaren lehen emaitzak ezagutzera eman zituen atzo goizean Irungo Alkartetxean egindako agerraldian. Oinatz Mitxelena bozeramaileak 300dik gora ekarpen bildu dituztela zehaztu zuen eta horien artean “240 inguru gehitu ditugu proiektu zehatz bezala”, erantsi zuen.
Bi bide martxan jarri zituen koalizioak horretarako, bata, batzar irekiak eta bestea, internet bidez. “Gure gain hartu ditugu gure oinarri ideologikoekin bat egiten zutenak”, azaldu zuen Mitxelenak. Barneratu ez dituztenak aldiz, zergatik ez dituzten aintzat hartu azaldu egin diete ekarpena egin zutenei.
Hala, 240 ekarpen horien artean denetarik dagoela onartu du Mitxelenak, “ez dira soilik hirigintza edo auzo bateko arazoak, orokortasunean dauden bestelako proiektuak baizik”. 21 arlo jorratu ditu koalizioak bi bloke ezberdinetan, sozioekonomikoa batetik eta gizarte politika bestetik, eta “orokortasunean daude bestelako proiektuak dira”.
Hori horrela, aldizkari bat prestatu du koalizioak, eta asteburuan eta datorren astean zehar Irungo postontzi guztietara iristea espero dute. “Gure lehentasunak markatzen dituen aldizkaria da eta lehenengo aldizkari hori kanpainaurrean gure programa izango da”, Mitxelenak esan duenez.
Kanpaina ofizialaren aurretik
Orain, programaren aurreproiektua gizarteratzea besterik ez zaio falta koalizioari. Horretarako lan sektore eta gai jakin batzuk kontuan hartuko dituzte, hala nola, hezkuntza, hizkuntza, kirola… Eta eragile guzti horiekin “lanketa berezia” egingo dutela ziurtatu du Mitxelenak: “Haien ekarpenak jaso eta gure lehentasunak esplikatuko ditugu”.
Azkenik, Bildu Bira ere egingo dutela aurreratu du alkategaiak, “baina aurten kanpainatik atera eta kanpainaurrean finkatu dugu”. Apirilaren azken asteburuan furgonetan eta bizikletan egiteko asmoa dutela agertu du Mitxelenak.
