Erabakitzeko eskubidea ehuntzen ari dira Hondarribian

Gure Esku Dago-k hautestontzi erraldoiak eraikiko ditu ekainaren 21ean Donostia, Bilbo, Gasteiz eta Iruñean

Asier Perez-Karkamo

2015/03/31

Amuten elkartzen den taldeak ia-ia bukatu du bere oihala

Ekainaren 21erako Gure Esku Dago mugimenduak erabakitzeko eskubidearen aldeko ekintza berri bat ari da prestatzen. Hego Euskal Herriko lau hiriburuetan hautestontzi erraldoiak eraikiko dituzte, “sinbolikoki, etorkizuna eskuetan hartzeko eskubidea” aldarrikatzeko. Igandean egin zuten ekimen berriaren aurkezpena, Iruñean, baina Hondarribian aspaldi ari dira lanean. Hautestontzi horiek oihalez eginak izango dira, herriz herri ehuntzen ari diren oihalekin egindakoak. Hondarribian badira hilabete pare bat ari direla horretan lanean eta dagoeneko badira oihal batzuk osatuak: “Koadrila eta zenbait familiak dagoeneko ohila pertsonalizatzen dabiltza, Zumardikoak abesbatza, Olagarro abesbatza, arraunlariak, emakume korrikalari koadrila, Harresi elkartea…”, azaldu du Hondarribiko Gure Esku Dagok.

Herritarren desioekin ehundutako oihaletako bat

Datozen asteetan herriko elkarte, lagun koadrila eta «erabakitzeko eskubidearekin bat egiten duen herritar orori» zabalduko diete ekimena. Iruñean azaldu zutenez, nahi duenak bere oihal zatia jaso dezake, bere “borondatea, asmoak, esperantzak eta ametsak” jar ditzan. Hurrengo asteetan Hondarribian egiten ari diren lanaren berri emango du Hondarribiko Hitzak. Besteak beste, orain arte egindakoa ezagutu eta eta Gure Esku Dagoren ekimenarekin parte hartu nahi duenak zer egin behar den jakiteko aukera izango da.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.