Juana Bengoetxea da Irungo PP-ren alkategaia

Borja Semper Gipuzkoako PPren presidenteak egin du de Bengoetxearen aurkezpena; ez dute zerrendaren gaineko xehetasunik eman.

Rebeka Parras

Irun

2015/03/30

Juana de Bengoechea aurkeztuko da aurten ere PPren udal taldeko alkategai gisa

Juana Bengoetxea aurkeztuko da aurten ere PPren udal taldeko alkategai gisa

Irungo PPren udal taldeak agerraldia burutu du gaur goizean, 2015eko maiatzaren 24ko udal hauteskundeei begirako zerrendaburua aurkezteko helburuarekin. Borja Semper Gipuzkoako PPren presidenteak eta Eusko Legebiltzarreko popularren bozeramaileak parte hartu du aurkezpenean. Hori horrela, Bengoetxea hiria “ezagutu” eta “maitatzen” duen pertsona bat dela nabarmendu du Semperrek hitzaurrean; are gehiago: “arazoak konpontzeko ideiak dauzkan zerrenda eta zerrendaburu bat proposatzen diegu Irungo hiritarrei”. Bengoetxeak bere aldetik, alderdi politiko berriek lor ditzaketen ordezkaritza ez dela “mehatxu” bat “aukera” bat baizik azpimarratu du. Eta ildo horretan, alderdi politikoak “bizikidetzarako tresna” izateaz gain, “etorkizuna eraikitzeko” erreminta ere direla ohartarazi du zerrendaburuak. Hala, Irungo PPren hauteskunde programa bost puntutan oinarrituko dela jakinarazi du Bengoetxeak:

Adiskidetasuna: Azkenaldian sortutako alderdiek “etsai” bat izendatu behar dutela uste du PPren alkategaiak, “soberan dagoen norbaiten bila ari dira; horixe da populismoaren gakoa”. Bengoetxearen arabera, “gu ezberdinak gara, adiskidetasunaren aldeko apustua egiten dugu”.
Hiritarren duintasuna: “Itxaropena izateko gaitasunean datza”, adierazi du. “Itxaropena duen hiritar bat, gaizki pasatzen egon arren, duintasuna duen hiritarra da”.
Justizia eta ekitatea: Hiritarrek “justua” deritzotenarekin edozein ahalegin egingo dutela uste du Bengoetxeak.
Oraina finkatzea: “Gure gurasoek lanbide bat baino gehiago zuten eta horrela eraiki zen Espainia. Egindako lan guzti hori finkatu behar dugu, zenbait ahotsek sistema hautsi eta zerotik hastea proposatzen dutelako”.
Etorkizuna prestatzea: Alkategaiaren aburuz herritarrei “ez zaie axola orain dela bost urte zer gertatu zen, jendeari oraina eta etorkizuna inporta zaie”.

Azkenik, Irungo PPren zerrenda hizpide izan arren, hura osatuko dutenen gaineko xehetasunik ez du eman gaurko aurkezpenean alkategaiak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.