Zazpi urte eta hamar hileko zigorra hiru emakume erasotzeagatik
2012ko abenduaren 6an eta 7an burutu zituen gizonak delituak; gaur eman du zigorraren berri Gipuzkoako Lurralde Auzitegiak
Zazpi urte eta hamar hilabeteko zigorra ezarri dio Gipuzkoako Lurralde Auzitegiko Lehen Aretoko epaileak gizon bati hiru emakumeri eraso egiteagatik, Irunen. Zenbait komunikabidek zabaldutako informazioaren arabera, emakume bat bortxatzen saiatzeagatik, beste bi emakumeren aurka sexu gehiegikeriak egiteagatik eta lesio delitu bat burutzeagatik zigortu du epaileak gizona.
Erasoak 2012ko abenduaren 6an eta 7an burutu zituen gizonak. Espetxe zigorraz gain, 90 euroko isuna, eta biktimengandik urruntzeko agindua eta haiekin harremanetan jartzeko bost urteko debekua ezarri dizkio epaileak akusatuari; baita biktima bakoitzarentzako indemnizazioak ere: 6.000 euro gehiegikeriak pairatu zituen emakume bakoitzarentzat eta 9.000 eurokoa bortxatzeko saiakera bizi zuenarentzat.
