Kirol instalazioak Zubietara lekualdatzeko epeak egingarriak "ez direla" dio EH Bilduk

Plaiaundiko kirol instalazioak Europak ezarritako epeen barruan husten ez badira isunak izango direla ohartarazi dute

Rebeka Parras

2015/03/16

Zubietako landa eremua

EAJren udal taldeak eta Bidasoaldeko Lagunak talde ekologistak orain gutxi plazaratutako kezkari jarraiki, Plaiaundiko kirol instalazioak lau urteko epean Zubietara lekualdatzea “egingarria ez dela” uste du Oinatz Mitxelena Irungo EH Bilduren udal taldeko bozeramaileak. Iragan astean sinatu zuten Hondarribiko eta Irungo udalek, Eusko Jaurlaritzak eta Euskadiko Parkeen Sareko presidenteak Bidasoko Parke Teknologikoa Zubieta-Urdanibian eraikitzeko hitzarmena. Bertan eraiki nahi ditu Irungo Udalak kirol instalazio berriak, eta alkateak agerraldian adierazitakoaren arabera, lauzpabost urte beharko dira azpiegitura berria prest egoteko. Epeak betetzea ezinezkoa dela uste du hala eta guztiz ere EH Bilduren udal taldeak. Europak Eusko Jaurlaritzari ezarritako epea 2019an bukaerara iristen dela ohartarazi zuen Mitxelenak, eta haren arabera “egingarria baldin bada, zergatik pasa dira 15 urte Zubietara eramateko planteamendua egiten denetik?”. Hori horrela, Europatik iritsitako isunak “bai ala bai” ordaintzen direla eta “milioikoak” izan daitezkeela ere ohartarazi du abertzaleak: “Europak Espainiako Estatuari jarriko lioke isuna, eta eskumena Eusko Jaurlaritzarena denez, Madriletik Jaurlaritzara pasako litzateke isun hori. Eta Jaurlaritza uste dugu ez dela prest egongo hori ordaintzeko”. Hala, koalizioak San Migel-Anaka eremua proposatu zuela gogora ekarri zuen Mitxelenak. Baina egoera honen aurrean, parte hartze prozesu bat abiatzeko proposamena egin du EH Bilduk, “herritarren interesekoa den zerbait herritarrek erabaki dezaten”. Proposamenean lanean ari direla onartu zuen bozeramileak eta apirila bukaerarako prest edukitzea espero dutela adierazi zuen.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.