Gaurtik da Martxoak 8 Puntaleko eskolan
Arma Plazan Bidasoko emakume artisten erakusketa ireki du Emekik eta gaurtik tailerretako lanak erakutsiko dituzte Puntaleko egoitzan. 16:00etan inauguratuko dute. Martxoaren 8a hurbiltzen ari da eta ugarituz doaz egun horri lotutako ektaldiak.
Martxoaren 8ko ekitaldien harira Emekik antolatu duen programaren barruan, elkarteko tailerretan egindako lanen erakusketa irekiko dute gaur Puntaleko eskolan, Emekiren egoitzan. Lauretan da inaugurazioa eta igandera arte egunero zabalduko dute arratsaldez, 16:00etatik 19:00etara.
Ez da erakusketa bakarra. Astelehenetik eta igandera bitarte, Bidasoko emakume artisten bilduma ikus daiteke Arma Plaza Interpretazio Zentroan, hori ere Emekik antolatuta. 10:00etatik 18:00etara irekitzen dute; igandean goizez bakarrik. Igandean da emakumeen eguna, eta Hondarribian asteburuan egingo dituzte horren gaineko ekitaldi gehienak, baina bistan denez, astean zehar ere bada zer egin eta zer ikusi.
Hala, bihar osteguna, emakumea ardatz duten bost film labur proiektatuko dituzte Denda kaleko Kultur Etxeko areto nagusian, doan. Filmazpit programan txertatzen dira, hau da, jatorrizko hizkuntzan eta euskarazko azpitituluekin emango dituzte. 20:00etatik aurrera, honako zintak jarriko dituzte: The curse, Irene, Mobile homes, Rae eta What to bring to America.
Esan bezala, asteburuan bilduko dira bai Emekik bai Hondarribiko Udalak antolatutako ekitaldi gehienak, horien artean, Pepita Goikoetxeari egingo dioten omenaldia. Urtero emakume bat omentzen du Emekik eta aurten Barriotxinokua aukeratu dute.
Ostiralean, Goikoetxeari egindako elkarrizketa luzea argitaratuko du Oarso Bidasoko HITZAk, papereko edizioan.
Pepita Goikoetxea Lekuona omenduko dute
