Gran Sol, Eibar futbol taldea eta Txikiklink, Klink elkartearen bazkari solidarioaren osagaiak
Martxoaren 14an egingo dute, koloneko minbiziaren ikerketarako dirua biltzeko
Klink elkarteak martxoaren 14a markatu du egutegian errotulagailuz, egun horretan egingo baitute hurrengo bazkari solidarioa, koloneko minbiziaren ikerketaren aldekoa. Egun horretan, gainera, Txikiklink haurtzaindegi zerbitzua estreinatuko dute. Txartelak dagoeneko eros daitezke Alzaga urdaitegian, Kai Alde gozodendan eta Batzokian. Hamabost euro baino ez ditu txartelak balio.
Elkartearen sorreratik, helburu solidarioa izan dute Klinken eta bide horretan asko mugitu dira, baita ingurukoak mugiarazi ere. Oraingoan, Gran Soleko sukaldariengana jo dute eta hauen esku geratuko dira “bai bazkaria prestatzea, baita gastuak ere”.
San Pedro kaleko jatetxekoak ez dira koloneko minbiziaren ikerketaren aldeko bazkariarekin bat egin duten bakarrak. Eibar KEk hainbat material eskaini dio Klinkeri egun horretarako, eta bazkariaren ondoren zozkatuko dute material hori.
Klink elkartearen urteko bigarren bazkari solidarioa izango da. Urtarrileko azken larunbatean Sanfilippo gaitzaren ikerketarako dirua bildu zuten Klinkekoek.
