Hirugarren postura itzuli da Union Atletico Madril B-rekin 2-0 galdu ondotik

Madrilera bidaia egin zuten txuribeltzak eta zorte handirik gabe, ezin izan zuten ezer egin sailkapeneko 14. taldearen aurka

Rebeka Parras

Irun

2015/02/16

Atletico Madril-Real Union partidaren une bat

Pasa den astean lehenbiziko postuan kokatzea lortu zuen arren, hirugarren lekura jaitsi da aste honetan Real Union. Atletico Madril B taldearen aurka lehiatu ziren txuribeltzak Espainiako hiriburuan, eta zorte handirik gabe 2-0 galdu ondotik itzuli ziren Irunera. Azken jardunaldiaren ondotik, Real Madril Castilla eta Huesca taldeekin berdinduta daude irundarrak, 43 punturekin. Federazio Kopan bestalde ondo ari da Irungo taldea eta dagoeneko finalerdietarako txartela lortu du. Hala, igandean lehiatu ziren txuribeltzak Atletico Madril B taldearen kontra. 14. posizioan daude madrildarrak eta hasiera batean partida erraza zirudiena ezerezean gelditu zen azkenean. Partida hasi eta 16 minutura lortu zuen Madrilgo taldeak lehen gola sartzea. Irungoek berdinketa bilatu zuten, baina emaitzarik gabe iritsi ziren atsedenera. Atsedenetik bueltan ere gogor ekin zioten Aitor Zulaikaren mutilak gola bilatzeari, baina berriz ere, aldeko emaitzarik lortu gabe. Partida amaitzear zegoenean eta soilik minutu bat falta zenean bukaerarako, Atletico Madril Bk bigarren gola sartu zuen. Federazio Koparen finalerdietan Atletico Baleares taldearen aurka lehiatu zen asteartean Real Union Federazio Koparen barruan. Galen jokatu zuten lehia eta 4-2 irabazi zuten txuribeltzak azkenean. 54. minutuan ireki zuen markagailua kanpoko taldeak, eta horri erantzuten jakin zuen Unionek 60. minutuan. Uniondarren bigarren gola 81. minutuan iritsi zen Goikoetxearen eskutik. Bi taldeen arteko aurreko lehian emaitza bera izan zela eta, 30 minutuko luzapena adierazi zuen epaileak kanporaketa erabakitze aldera. Hori horrela, luzapena hasi eta gutxira iritsi zen txuribeltzen hurrengo gola. 115. minutuan sartu zuen talde bisitariak bigarrena, baina ez zuen ezertarako balio izan handik bi minutura laugarren gola sartzea lortu baitzuen Irungo taldeak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.