Urteko lehen bandera irabazi nahi du Ama Guadalupekoak etxean

Orio eta Bermeo ez dira lehiatuko Hondarribiko XV. Jaitsieran

Asier Perez-Karkamo

2015/02/06

Ama Guadalupekoa, iaz. Ibaian egin zen jaitsiera, eguraldiagatik.

Hotzarekin, baina arraunketan ondo aritzeko moduko itsasoarekin egingo da bihar Hondarribiko XV. Jaitsiera. Hondartza paretik irtengo dira traineruak eta bertan amaituko dute lana, 2.778 metrora dagoen balizaraino joan eta itzuli ondoren —gazteek eta emakumeek distantziaren bi heren egingo dute gutxi gorabehera—. Udan egiten den Hondarribiko banderarekin alderatuta, ziaboga bakarrera egiten da jaitsiera, eta ez hiru luzera, eta horregatik baliza urrutiago jartzen dute, itsaso zabalean. Biharkoa XV. ekitaldia izango da. Orain arte bi traineru dira palmaresaren goialdean, Hondarribia eta Orio. Oriotarrek azken hiru ekitaldiak irabazi dituzte, baina bihar ez dute parte hartuko, ezta aurreko beste hiruretan bandera lortutako Bermeok ere ez, eta etxekoek bosgarrena lortzeko aukera izango dute. 2006tik ezin izan dute berdeek etxeko jaitsiera irabazi. Orotara, hamabost traineru lehiatuko dira bihar, senior mailan. Haien aurretik, emakumeak (Badalona), gazteak (Hondarribia) eta beteranoak (Fortuna, Zarautz, Zumaia eta Getxo) irtengo dira. San Pedro C izango da senior mailako lehen trainerua ateratzen. Etxekoei dagokionez, Hondarribia C 16:09ean abiatuko da, bigarren trainerua lau minutu geroago, eta Ama Guadalupekoa 16:21an hasiko da arraunean. Hotza, baina itsaso ona Okerrik ezean, egunotan Euskal Herria pairatzen ari den fronte hotzak ez du galaraziko jaitsiera egin ahal izatea. Hotz handia espero da, baina itsasoaren egoera ona izango dela uste dute antolatzaileek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.