Hego Euskal Herriko hitzarmenak aplika ditzan eskatu dio LAB-ek Mercadonari

Arason ezarriko den hipermerkatu kateari Espainiako hitzarmenak alde batera uzteko eta lan baldintzak errespetatzeko eskaria luzatu dio sindikatuak

Rebeka Parras

Irun

2015/02/06

Araso industriagunea

Mercadonaren etorrerak hautsak harrotzen jarraitzen ditu Irunen. Aldeko eta kontrako ahotsak entzun daitezke gaiaren inguruan. Iritzia ematen azkena, LAB sindikatua izan da. Haren arabera, eragile gehienek “berri pozgarritzat” jo dute hipermerkatu katearen irekiera Irunen, “lanpostu berriak” sortuko direla eta. Hala eta guztiz ere, “esperientziak argi uzten digu kate handi batek sortutako enplegu prekario edo lanaldi partzialeko batek merkataritza txikiko, garraiolari eta bertako ekoizleen 3-5 lanpostu ordezkatzen dituela”. Era berean, lan baldintzen inguruko datuak “ezkutatzen” dituztela salatu du LABek: “Mercadonak zabaldu ohi duen lekuetan estatu espainiar mailan duen enpresa hitzarmena aplikatzeko ohitura du”. Horri aurre egiteko helburuarekin, hego Euskal Herriko hitzarmenak aplika dezan galdegin dio kateari. “Hau honela ez bada, LABek helburu hori lortzeko ekimena martxan jarriko du”, erantsi du. Jaiegunak eta 300 saltokien galera LABek hipermerkatu katearen aurka egiteko baliatutako beste arrazoietako bat irekiera irizpideak izan dira. Igande eta jaiegunetan irekitzea ez dutela “onartu, ezta onartuko ere” adierazi du sindikatuak. Langileen lan baldintzetan “atzerapausoa” dela uste du, eta horretarako “beharrik ez dagoela”, gaineratu. “Merkataritza kate handi batzuen interes ekonomiko hutsetatik harago ez dago inongo arrazoirik hau aldatzeko, eta irekitzen hasteko”, arrazoitu du. Horrez gain, “azken hiru urteetan arrazoi ezberdinak medio 300 komertzio itxi dira gure herrian”, adierazi du. Hala, erabakiak kontsumoa hiriaren kanpoaldera eramango duela sinetsita dago sindikatua: “Ez da ulertzen nola merkatari txikiak laguntzeko lanean jardun beharko lukeen udal batek horrelako erabakiekin kontrakoa eragitea”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.