Hamahiru pertsonei ostatu eman die udalaren dispositibo bereziak
Tenperatura bost gradura iristen denean aktibatzen du Irungo Udalak larrialdi dispositiboa; kalean edo leku ez egokietan lo egiten duten lagunei zuzenduta dago baina haien kabuz onartu behar dute laguntza.
Kalean edo leku ez egokietan lo egiten duten pertsonei zuzendutako larrialdi dispositiboak hamahiru lagunei ostatua eman die abendua bukaeratik. Tenperatura bost gradura jaisten denean abiatzen du Irungo Udalak dispositibo berezia. Udaltzaingoa arduratzen da pertsona horiek aurkitzeaz eta ostatua nahi ote duten galdetzeaz. Hala, udaltzainek ezin dituzte ostatura joaten behartu eta orondatez onartu behar dute eskaintza kale gorrian bizi direnek. Hamahiru lagun horiek 40 aldiz izan dira dagoeneko Irungo ostaturen batean gaua igarotzen.
Udalak oroitarazi duenez, harrera ordutegia 20:30etik aurrera da eta hurrengo eguneko 10:00ak baino lehen utzi behar dute ostatua. Gaua igarotzeaz gain, edari beroa eta gosaria ere ematen zaie.
Udaltzaingoak dei egin die herritarrei kale gorrian dauden pertsonak ikusiz gero, abisua pasa dezaten.
