Hirigune historikoa bisitatuko dute larunbatean, Ramery etxea barne
Arma Plaza fundazioak antolatu du eta ez da erreserbarik behar. 11:00etan hasiko da.
Larunbat honetan, hilak 10, Ramery Jauregia ezagutzeko aukera izango da, Arma Plaza Fundazioak bisita gidatu berezia antolatu baitu Hondarribiko hirigune historikora. Ramery eraikinaz gain, gaztelua eta parrokia ere bisitatuko dituzte barrutik, eta Santa Maria ateari, harresiari eta Erreginaren baluarteari buruzko azalpenak emango dira.
Bisitariek 6 euro ordaindu beharko dute (12 urtetik beherakoek, doan), baina ez dago erreserba egin beharrik. 11:00etan Arma Plazan agertzea nahikoa izango da, bertatik abiatuko baitira.
