Elkartasun lasterketa aurkeztu dute goizean herriko hainbat kirolarik
Hilaren 29ko, igandea, elkartasun lasterketa antolatu dute hainbat kirolarik. Preso eta iheslarien egoera “larria” dela medio, elkartasuna adierazi nahi dute ekimen honen bidez eta distantzia hori murrizteko pausoak eman nahi dituzte.
Lasterketak 6,5 kilometro izango ditu (iazko ibilbide bera izango da) eta Doneztebe plazatik abiatuko da bi txandetan: 11:00etan haurrena eta 11:30ean helduena. Izena eman daiteke dagoeneko herriko hainbat tokitan: Sorgin-zulo eta Amazkar tabernetan, Garmendi txokolategian eta Elorsoro kiroldegian. Horrez gain,
herrikrossa.com atarian ere eman daiteke izena.
Hilaren 25a baino lehen izena ematen dutenek 4 euro ordaindu beharko dute eta egunean bertan ematen dutenek, berriz, 5 euro. Haurrek ez dute izenik eman beharko. Dortsalak hilaren 28an (17:00etatik 20:00etara) edo egunean bertan (10:00etatik 11:00etara) hartzeko aukera egongo da.
Iaz kamiseta teknikoak saldu zituzten eta aurten niki berarekin ateratzeko deia egin dute antolatzaileek. Kamiseta hori ez dutenek egunean bertan erosi ahal izango da.
Lasterketa horren inguruko informazioa sarean topa daiteke: elkartasunlasterketa.blogspot.com.es helbidean edota Facebookeko orrialdean (elkartasun lasterketa).
1200 kilometro
Antolatzaileek gogoratu dutenez, herriko presoak 1200 kilometrora urrunduta daude: “Astero senide eta lagunek bidaia hori egin behar izaten dute bisita egiteko. Elkartasun pauso hauen bidez, distantzia hori murrizteko pausoa eman nahi dugu, preso eta iheslarien eskubideak errespetatuak izan daitezen sortuko dugun itsasoko tantak baikara gu ere”.