"Udaltzaingo eredu berria" proposatu du udalak
Auzoko udaltzaina sortu du Errenteriako Udalak, “Udaltzaingo ereduaren kontzeptua” lantzen ari dela. Udaltzaingo eredu berri hori datozen urteetan martxan jarri eta hobetzen joango den prozesu baten barruan egongo dela jakinarazi du, Julen Mendoza alkateak.
Eredu hori herritarrekin batera eraiki nahi dute, eta horien parte hartzea “behar-beharrezkoa” dela nabarmendu du Mendozak. Hala, asteazkenean, hilak 11, bilera bat egingo dute gai hori lantzeko, 17:30ean, Merkatuzarren. Bilerara deitu dituzte gizarte eremuko eragile, auzo elkarte, emakume eremuko eragile eta jubilatu elkarteak.
Mendozak zehaztu duenez, helburua herrian kalitatezko udaltzaingoa izatea da, “herritarren zerbitzura jarrita, proaktibo eta prebentiboa, herritarrengandik hurbil dagoena eta haiekin inplikatua, hurbilekoa eta beste instantzia batzuekin koordinatua egongo dena”.
