Hasi dira lurra mugitzen Bidasoko Ospitalera joateko bidegurutze inguruan. Laranja koloreko marrak margotu dituzte asfaltoan eta makinak sartu dira. Zalantzarik gabe, egunero eremu hori autoz, oinez, bizikletaz edo zaldiz zeharkatu behar dutenek eskertuko dute
Egun Jaitzubia inguruan sortzen diren arazoak gainditu nahi dituzte biribilgunearekin
Hasi dira lurra mugitzen Bidasoko Ospitalera joateko bidegurutze inguruan. Laranja koloreko marrak margotu dituzte asfaltoan eta makinak sartu dira. Kontuz gidatu behar da orain inguruan baina, zalantzarik gabe, egunero eremu hori autoz, oinez, bizikletaz edo zaldiz zeharkatu behar dutenek eskertuko dute zer edo zer egiten hastea.
Gipuzkoako Foru Aldundiko Mugikortasun eta Bide Azpiegitura departamentuak atzo eman zuen obren berri; egiten hasi direnak eta aurrerago egingo dituztenak azaldu zituzten. Une honetan GI-636 errepidetik —Hondarribiko irteera— ospitaleko bidegurutzerainoko zatian egingo dituzte lanak, baina datorren urtean Amuteko biribilgunea egin nahi du aldundiak.
Aurreko agintaldian egungo egoera iraultzeko proiektua prestatu zuten, baina inbertsio handia eskatzen zuen, 43 milioi eurotik gora. Egungo foru gobernua ez dago horrelako inbertsio handiak egiteko prest eta, gainera, aurreko proiektuak babestutako natura-gune batean “ingurumen kalte nabarmenak eragiten zituen”, aldundiaren arabera. Horregatik beste aukera batzuk aztertu zituzten, “eta konponbide askoz ere merkeagoa lortu da, eta ingurumen kalte txikiarekin”. Soluzio berriekin, arazoari irtenbidea emango diotela uste dute aldundian, eta 25 milioi euro inguru aurreztuko dituzte.
Hasi dituzten lanen aurrekontua 3 milioi eurokoa da, gutxi gorabehera, eta Amuteko biribilgunea egiteko beste 700.000 euro inbertituko dituzte. Aurrerago, AP-8 autobideko sarrera-irteera berria eta ingurabidea eraikiko dute, 15 milioiko kostuarekin.
Lau besoko biribilgunea
Hiru dira Jaitzubiako errepide zatian hasi dituzten lanak, biribilgunea, errepidearen bikoizketa eta pasabide bat. Biribilgunea lau besokoa izango da: ospitalera joateko bat, Hondarribia-Hendaiara beste bat, Jaitzubiara hirugarrena eta Donostiara azkena.
Bigarren lana errepidearen bikoizketa izango da, GI-636 eta N-638 errepideen arteko loturatik biribilgune berrira. Orain, Hondarribitik ateratzen direnek eskuinetik datozenei pasatzen utzi behar diete, baina aldundiak abiatu duen obra eta gero hori ez da horrela izango, trafikoa bikoiztuko dutelako. Eta beste norabidean gauza berbera, biribilgunetik bi errail irtengo dira, eta Hendaiarantz joan behar dutenek eskuinekoa hartzeko aukera izango dute, eta Hondarribira doazenek ezkerrekoa.
Horrez gain, GI-636 errepide gainean pasabidea egingo dute, oinezko zein bizikletentzat, errepidea zeharkatu gabe Jaitzubia auzoko alde batetik bestera joatea bermatuz. Egun pertsona askok egiten dute hori egunero, errepidea zeharkatu, eta ez pertsonak bakarrik, gertu dagoen hipika elkarteko zaldiak ere.
Dagoeneko biribilgune eta errepidearen bikoizketa lanak hasiak dira, eta 8 hilabeteko epean amaituko dituzte. 2.033.800 euroko aurrekontua dute eta Zubieder eta Mariezcurrena enpresek sortutako BBEEa ari da obra egiten.
Pasabidea, aldiz, esleipen prozesuan da. Lau hilabetetan egin daitekeela uste dute, eta aurrekontua 990.000 euroan zehaztu dute. Lau metro zabalerako pasabidea izango da, eta bi aldeetan arrapalak izango ditu. Pasabidera igotzeko eskailerak ere izango ditu azpiegiturak, eta etorkizuneko aldundiaren bidegorri sarearekin lotura izango du.
Zarataren aurkako pantailak
Ospitaleko biribilguneaz eta errepidea zeharkatzeko pasabideaz gain, trafikoari lotutako beste lan batzuk egingo ditu aldundiak Irunen eta Hondarribian, “ingurune horretako herritarren bizi-kalitatea hobetze aldera”. Batetik, GI-636 errepideak Dunboa auzoan eragiten duen zarata baretzeko 213 eta 60 metro luzerako bi pantaila jartzen hasi dira, 3,5 metroko altuera hartuko dutenak. Murias ari da pantailak jartzen, 336.100 euroko kostuarekin.
Eta 2014an Amuteko biribilgunea eraiki nahi dute. Aurreko legealdian 1,5 milioi euroko egitasmo bat aurkeztu zen, baina proiektua berraztertu eta 700.000 euroan egin daitekeela uste dute, “abantaila berberekin”. Aldundiaren bidegorri sarea bertatik pasatuko litzateke eta, hori horrela, bidegorria eraikiko lukete biribilgunearekin batera.
Apo lasterkaria babesteko neurriak hartuko dituzte Jaitzubian eta Zubietan
Apo lasterkariak izan dezakeen kaltea
konpentsatzeko neurriak hartuko dituzte
Jaitzubian egin behar dituzten lanek ingurumenean eta, zehazki, apo lasterkariaren populazioarengan eragin dezaketela uste du Aranzadi zientzia elkarteak. Horrela, “apo lasterkariaren populazioan sor ditzakeen mehatxuak konpentsatzeko neurriak” hartu dituzte, eta zortzi zonalde aukeratu dituzte horretarako, hiru Jaitzubiako baratze eremuan, eta beste bost Zubietako lursailetan: “Kasu gehienetan sega belardiak dira, baina badira sastrakadi txiki, lugorri edota zuhaizti irekiko zelaiguneak ere. Eremu guztietan habitataren hobekuntza aurreikusten da, ugalketarako hezeguneen berreskurapena edota sorreraren bidez”.
