Irungo EH Bildu pozik dago Euskararen Eguneko ekimenekin, baina kritikak ere baditu
Irungo EH Bilduk atzoko egunaren gaineko, Euskararen Egunaren gaineko balorazioa egin du, eta oro har, gustura dago koalizioa hirian egin diren ekimenekin, eta horietan izan diren parte hartzearekin. Elkarlanaz ere gogoeta egin du, eta horren aniztasuna goraipatu du. Aldi berean, udalaren erakunde adierazpenaren testuarekin ados dago koalizioa, udal gobernuak aurkeztutako testuari ekarpenak egin, eta onartu zituztelako. Horrela, adierazpen hori, “intentzio hutsez” osatuta egotetik, “konpromisoekin” zabaldu zuten hiritarren aurrera: “Gure proposamenak jaso zuen babesa goraipatzekoa da, eskertu egite dugu talde ezberdinen jarrera positibo eta eraikitzailea”. Behealdeko PDFan dago adierazpen hori; alderdi guztiek PPk ezik adostu eta onartu zuten.
Hala ere, udal gobernuari eta PPri kritikak egin dizkio koalizioak. Jose Antonio Santano alkatea buru duen gobernu batzordeak adierazpenetatik ekintzetara pasatu behar duela uste du EH Bilduk, “gaur da eguna oraindik udal gobernu honen jarduera gaztelania hutsean dela. Adibide gisa, 2014ko aurrekontuen proposamena gaztelania hutsean dago, eta hori baldintzatzailea izan da gure taldearentzat”.
PPri, bere aldetik, eskatu diote konpromisoa har dezan euskararen alde, “euskara maitatzen dutela esaten badute ere, euskararen aldeko konpromisoak ez dituzte maite”. PPri “hipokresia ariketa egitea” leporatu die, esanaz euskara ez dela museoko hizkuntza bat, “euskara bizirik behar dugun hizkuntza bat da”. Hala, bide horretan, euskara denek erabiltzeko moduan izan behar dela uste du koalizioak normalizazioaren bidean, “eta hori ezin da ezagutza eta erabilera bultzatu gabe lortu”.
Erakunde adierazpena
