‘Smart Land Bajo Bidasoa’
Edo izan zitekeen Behe Bidasoa Lurralde Adimentsua; edo Territorio Inteligente Bajo Bidasoa; edota Smart Land Down Bidasoa.
Baina ez, guri nahasketak gustatzen zaizkigu, Euskara baztertzen duten hizkuntz nahasketa cool-ak. Bere egunean Feria Internacional de la Costa Vasca erakustazokaren kasuan egin bezala. Non, Vasca
v-rekin bada ere, FicoBako b horrek ukitu cool-a ematen zion (frantsesari keinu eginez —basque— eta era berean horrek kutsu baskoa emango balioke bezala). Edo Hondarribian Atunaren Eguna Bonito Eguna izenburupean antolatu nahi izan zutenean bezala, Bonito de Fuenterrabia-k merkatu proiekzio handiagoa omen zuelako Hondarribiko Atuna-k baino.
Finean, euskararen erabilerak edota kutsu baskoak produktuaren edota proiektuaren balioa edota potentzialtasuna gutxituko balu bezala jardun ohi da gurean, eta horrexegatik, komunikazio marketin berarekin Hondarribiko eta Irungo alkateak Bartzelonara joan zitzaizkigun pasa den astean, teknologien munduko hainbat enpresekin batera, bi hirietan lantzen dabiltzan Smart Land Bajo Bidasoa proiektua Smart Cities Mundu Kongresuan aurkeztera.
Proiektu honetan garatutako aplikazio teknologikoari esker, udal zerbitzu desberdinei buruzko datuak ikus eta azter daitezke denbora errealean (trafikoa, udaltzaingoa, gas hornidura, hondakin kudeaketa, argiteri publikoa, ureztatze sistema). Aplikazio teknologiko honi esker uneoroko datu erreal desberdinak mahai gainean jarri eta beharrezkoak diren erabakiak hartu ahal dira zerbitzu publiko hobeagoa eskainiz herritarrari.
Ez dago dudarik tresna teknologiko garrantzitsua eta baliagarria dela Smart Land Bajo Bidasoa proiektuak garatutakoa.
Aldiz, deigarri egin zait proiektu aitzindari hau martxan zegoenik ere ez jakiteak. Hau da, mundu mailako kongresu batean aurkeztu izanaren notizia izatea herrian martxan den proiektu aitzindariaren berri izateko modua nire kasuan. Eta horrek zer pentsa arazi dit administrazioa, herritarra eta Smart Cities edo Hiri Adimentsuen hirukoaren inguruan.
Dudarik gabe teknologia berriek, teknika eta talentuak, herritarrei zuzendutako zerbitzu desberdinen kudeaketan funtsezko zeregina dute. Besteak beste, aurrezpen energetikoa eta iraunkortasuna ahalbidetzen dute eta horregatik, hauen erabilpen intentsiboa areagotzen joango da. Aldiz, informazio eta komunikazio teknologi berrien erabilera ez da nahikoa, besterik gabe, Hiri edo Lurralde Adimentsua izateko. Garapen ekonomiko iraunkorra eta jasangarria, baliabide naturalen kudeaketa arduratsua eta hausnartua, hiritarren denboraren erabilera egokia, gobernantza parte hartzailea eta informazio gardentasuna sustatu behar ditu ere.
Gero eta konplexuagoak diren gizarte arazoei adimentsuki aurre egiteko herrigintza egiteko erak aldatu behar dira ezinbestean eta ordezkaritzako politikatik iritzi publikoaren politikarako urratsa eman beharra dago. Edozein gairen aurrean eta edozein mailatan herritarrek modu aktiboan parte hartu dezaten espazio iraunkorrak eraiki eta eskaini behar dira.
Eta munduko mapan kokatu nahi badugu, lehiakor izan nahi badugu, balio erantsi bereizgarria eskaini beharra dago. Eta balio erantsi hori, kanpoan baino, lurralde honen izaeran eta berariazko balore eta nortasun espezifikoan bilatu beharko ditugu bereziki. Konplexurik gabe gurea dena erakutsiz, erabiliz eta eskainiz. Globalki pentsatuz, baina tokian jardunez.
Gainontzean teknologikoki adimentsuak izan gaitezke, baina nor garen eta non gauden ez dugu jakingo.
