Plan estrategikoa "gaurtik proiektu berrietara irekia" dagoela esan du Mendozak
Joan den larunbatean egin zuten 2025era begira prestatzen ari diren plan estrategikoaren proiektuen aurkezpena Merkatuzarren. Julen Mendoza alkateak ekitaldiaren balorazio positiboa egin du gaur, “agertutako jende kopuruarengatik, parte hartzaileen aniztasunarengatik eta aurkeztu ziren proiektuen sendotasunarengatik”.
Alkatearen arabera, plan estrategikoa ez da proiektu politikoa ezta udalarena ere: “Herriaren proiektua da”. Zentzu horretan, ekarpen guztien bilduma dela iritzi dio, eta protagonistak “denak” direla.
Hala ere, proiektua kritikatu daitekeela eta kritikatuko dela nabarmendu du, baina argi utzi du ez dela estatikoa: “Gaurtik bertatik proposamen berrietara irekita dago, proiektu berriak gehituko zaizkio, eta daudenak birformulatuko dira, bidea delako garrantzitsuena”.
Proiektua Gizarte Zerbitzuen Saila finkatuta izateagatik aurrera atera dela nabarmendu du Mendozak, eta hori ez dela legegintzaldi honen meritua, “aurreko legegintzaldietan eraikita zegoenarekin jarraitu besterik ez dugu egin”.
Proiektu “sendoa”
Larunbateko ekitaldian proiektuaren sendotasuna agerian geratu zela adierazi du alkateak, eta anbizio handikoa dela, “baina erreala”. Ildo horretatik, 2014eko aurrekontu proposamenean horrekin lotutako proiektuak bildu direla aurreratu du, nahiz eta ez zehaztu zeintzuk izango diren. Izan ere, 2019rako proiektuaren zati garrantzitsu bat garatua egongo dela esan du.
300 lagun inguru aurkeztu ziren, eta horiek “herriaren aniztasuna” ordezkatzen dutela iritzi dio Mendozak: “Eragile sozial, kultural, ekonomiko finantzario eta instituzionaletako ordezkaritza anitza bildu zen, nortasun sentimendu eta jatorri ideologiko ezberdinetakoak”. Instituzioetako ordezkarien artean, Eusko Jaurlaritza, aldundi eta beste zenbait udaletakoak izan zirela nabarmendu du.
Ordezkari horiek kontuan hartuta, proiektua bera Pasaiako badiaren biziberritzearen testuinguruan kokatzen dela aipatu du, “ez baitago biziberritzerik inguruko herrien biziberritzerik gabe”.
Bukatzeko, eskerrak eman dizkie larunbateko ekitaldira azaldu ziren guztiei, baita prozesuan parte hartu baina agertzerik izan ez zutenei ere.
