Adostasunik gabe aurkeztu dela plan estrategikoa salatu du PSE-EEk
Joan den larunbatean egin zen plan estrategikoaren aurkezpenaren haritik, “kontsentsurik gabe, ikerketa ekonomiko-finantzario gabe eta Udalbatzak onartu gabe” egin dela kritikatu du Errenteriako PSE-EEk. Era berean, Udal Gobernu Taldeak egiten duen “udal baliabide, azpiegitura, lan talde eta ekonomiaren kudeaketa” salatu du. Ildo horretatik, gaineratu du gobernu taldeak “behartu” egin dituela udal langileak bihar, ostirala 29, plan estrategikoaren bileran egotera.
Larunbateko ekitaldi horri “kutsu elektoralista” atzeman dio PSE-EEk, plan “serio” bat izan beharrean. “Manipulazio argi bat dago, aurrera ateratzea kostako den esperantzak sortuz”, adierazi du. Horrek “frustrazioa” eragin dezakeela uste du: “Adostasuna lortzeko arduraz lan egiten ez bada, zaila izango da etorkizuneko ekintzak aurrera ateratzea”.
Hasieran, alkatea udal taldeekin eztabaidatzeko prest agertu zela esan du PSE-EEk, “baina bere oraingo ekintzak hitzen kontra doaz”.
