Etxartek eta Billaluzek prestatu, piztu eta zainduko dute txondorra
Dozenaka lagun elkartu zen Arditurriko Parketxearen inguruan larunbatean, Joxe Manuel Etxartek eta Joxe Billaluzek prestatutako txondorra pizten ikusteko. Beraiek prestatu, beraiek piztu eta beraiek zainduko dute, abenduaren 14ra arte. Arratsaldeko seietan piztu zuten txondorra, baina aurretik giroa berotzen ibili ziren.
14:30etik tren berdea hartu zitekeen Olaetxetik eta askok baliatu zuten zerbitzu hori. Jolasak, bertsolariak, tobera joleak… hotza zen Arditurrin, baina giroa ondo epeldu zuten ordubetez, arratsaldeko ekitaldi nagusiaren aurretik. Zer jan eta zer edan ez zen faltatu, gaztaina erreak, sagardoa, eta abar.
Hilaren 2an hasi ziren txondorra prestatzen. Garai bateko ikazkinen lana ezagutaraztea dute helburu eta asko zaindu dute txondorra bezala, egur pilaren inguruko eremua, hara joaten denak denbora atzera jauzi egin dezan. Eta ekitaldia bera ere asko zaindu zuten, eta gauaren iluntasunak lagundu zuen horretan.
Txondorra piztu eta gero, Etxartek duela 64 urtek bere aitak sozioari egindako bertsoak abestu zituen, txondorraren gainean, ke artean. Txalo zaparradarekin bukatu zen ekitaldia baina kostata hasi ziren bertaratutakoak handik alde egiten. Gustura zeuden han, txondorra pizten laguntzeko prestatutako suaren ondoan.
Bisita gidatuak eta erakusketa
Larunbateko ekitaldia ikusi ez duenak, edo errepikatu nahi duenak, txondorraren ingurukoak bisita gidatuan ezagutzeko aukera izango du. Horrez gain, Arditurrin jarri duten argazki-erakusketa ikusi daiteke, iazko ekitaldian ateratako irudiekin prestatutakoa, baita 2012ko txondorrari buruzko bideoa ere. Asteartetik igandera izango dira bisitak, 10:00etatik 14:00etara, eta larunbatetan arratsaldetan ere, 16:00etatik 18:00etara. Hori bai, aldez aurretik eman behar da izena, parketxean (943 49 50 69) edo Oiartzungo Turismo Bulegoan (943 49 45 21).
Abenduaren 14an itzaliko dute txondorra eta Olentzeroren Laguntzaileek bilduko dute bertan egindako ikatza. Olentzeroren ongietorrirako herriko plazara igoko dute, abenduaren 24an.
