Jon Darpon Osasun Sailburua.
Hitzaldia emango du gaur, Jon Darpon Osasun Sailburuak, 19:00etan, Reina aretoan:
Euskal osasun zerbitzuen egoera. Darponek onartu du duela urte batzuk orain baino diru gehiagorekin lan egiten zutela, baina hori zerbitzuen kalitatean ez duela eragin iritzi dio, “kontrakoa esatea, gezurretan aritzea da”.
Osasun pribatu eta publikoaren gaineko eztabaida pil-pilean dago. Osakidetzak izango al du zerbitzu publikoa eta kalitatea mantentzerik datozen urteetan?
Noski baietz. Behin eta berriro esan dugu. Esan eta egin. Datozen urteko aurrekontuen arabera ere, Osakidetzak, 3.300 milioi euro baino gehiago izango ditu. Hau da, aurrekontu on bat izango du bere goi mailako zerbitzuak mantentzeko. Gainera, horren arabera, egunero 6,7 milioi euro gastatuko ditugu osasun arloetan. Datuak argiak dira. Osakidetza publiko eta kalitatezko bat nahi dugu eta hori lortzeko bideak ipini ditu Eusko Jaurlaritzak.
Joan den urtean Osakidetzaren aurrekontuak murrizketa nabarmena izan zuen, aurten, ordea, igo egingo da, baina ez maila berean. Horrek zein ondorio utziko ditu herritarrengan?
Herritarrek betiko zerbitzu ona jasoko dute. Aurten ere, ez dut uste inork nabaritu duenik gure zerbitzuen kalitatea jaitsi danik. Nire ustez, kontrakoa esatea, gezurretan aritzea da. Beste urte batzuetan diru gehiago izan dugula argi dago, baino horrek ez du esan nahi kalitatea edo zerbitzu gutxiago emango ditugunik. Agian, ez ditugu hainbeste osasun zentru edo ospitaleak eraikiko, agian, erosketak beste era batean egingo ditugu ahal dugun guztia aurrezteko…baina ez ditugu herritarrentzako zerbitzuetan gure kalitatea jaitsiko.
Eta zer gertatuko da langileekin? Iaz “ahalegin” bat eskatu zenieten, aurten ere “ahalegin” gehiago egin beharko dute? Noiz arte?
Euskal gizarte guztia ahalegin berezi bat egiten ari da. Esparru guztietan, ahaleginak egiten ari dira. Eta Osakidetza ez da berezia. Gu zerbitzu publiko bat gara, ezin gaitezke euskal gizartetik aparte bizi. Datorren urtean ere, guztiek esfortzu bat egin beharko dugu. Hala ere, ziur nago denbora hobeagoak ere etorriko direla eta guztiontzat ere, egoera hobetu egingo dela
Horrek ez al du gaixoekiko arretan eragiten?
Ez noski. Orain arte bezala. Esan dudanez, agian, ez ditugu hainbeste eraikin bultzatuko edo martxan ipiniko eta agian, beste gauza batzuk ere ezingo ditugu jorratu baina Osakidetzak, oso profesional onak ditu eta Eusko Jaurlaritzak bere aldetik esfortzu handia ere egiten ari da, beraz, argi izan gaixoekiko arretan gure lan eta esfortzu guztia ipiniko dugula. Betiko moduan. Guk ez dugu zalantzan ipintzen gure langileen profesionaltasuna.
Ia urte erdia pasatu da kopagoa martxan jarri zela. Zer irakurketa egiten duzue?
Kopagoaren kontra agertu gara behin eta berriro. Ez dugu uste neurri ona denik eta horrela adierazi dugu bai hemen, baita Madrilen ere. Horregatik hainbat errekurtso aurkeztu ditugu kopagoen kontra. Guk, ekitatean sinisten dugu. Ezinbesteko iruditzen zaigu..
Pentsiodunek oraindik protestan jarraitzen dute, eta Errenterian, kasu, sinadurak biltzen ari dira. Neurri horrek izango al du iraungitze datarik?
Horrela izatea nahiko genuke. Gu ere ez gatoz bat kopagoarekin.
Osasun zerbitzu publikoa euskalduntzeko bidean Eusko Legebiltzarrak hainbat eskaera egin dizkio Osakidetzari, hala nola, 2014tik hasita hizkuntz irizpideak ezartzeko itundutako enpresa denei eta aldi baterako kontratatuko langileei. Osakidetzak neurri horiek hartuko ditu? Nola bideratuko ditu?
Osakidetzak bere bigarren planaren zirriborro bat aurkeztu du. Lanean gaude oraindik eta eskaera guztiak kontutan hartzen saiatuko gara. Herritar euskaldunei baita gazteleraz aritzen diren herritarrei eurek erabakitzen duten hizkuntzan zerbitzurik onena eskaintzea dugu helburu. Gure ardura da eta beteko dugu.
