450 lagunek eman dute izena arraunlarien omenaldiko bazkarirako
450 pertsonatik gora eseriko dira larunbatean Kai berriko Bentan egingo den herri bazkarian. Herri ekimenetik sortutako ekitaldia da, Kontxako estropada irabazi duten arraunlariak omentzeko xedea duena. Bazkariaren postrean omenaldia egingo zaie arraunlariei baina aurretik eta ondoren ere burutuko dituzte ekitaldiak. Antolatzaileak eskertuta daude herritarren erantzunarekin: “450 pertsona mugitzea azaroan, gaur egun bizi dugun krisia kontutan izanik, oso pozik egoteko zifra da”, esan dute eta gazteen interesa nabarmendu dute: “Gazteen artean ia 80 sarrera saldu dira, horrek esaten digu 15-20 urteko jende asko egongo dela eta 20tik 30era ere, arraunlari eta bere lagunak adin horietakoak direlako”.
Hondarribiko Udalak ordezkaritza bidaliko du bazkarira, alkatea eta kirol zinegotzia, besteak beste. 2005eko garaileekin egin bezala, aurten Kontxa irabazi dutenek urrezko arraun txiki bana jasoko dute, postrearen garaian. “Udalak arraunlariei ematen dien arrauntxoa bertan emateak ere gainbalio bat ematen dio, oso une polita izango delako”, adierazi dute.
Antolatzaileen ustez egun osoko festa handia izango da. “Elgetatik eta Irundik ere etorriko zaizkigu, eta jai giro bikaina dela ziurra da”. Jende askok bat egin du herri ekimenarekin, herritarrak nahiz enpresak. Hala, Ekialdebuseko E25 lineako autobusak Lurgorriraino iritsiko dira 13:00etatik 15:00etara. Eta «kirol kaiko tabernak oso ondo portatu» direla nabarmendu dute. Bentakoa bukatuta, festak bertan izango du segida. “Bazkaria eta arratsaldeko festa Kofradian, eta gero jarraipena Kirol Kaian eta Trucken egitea guretzat positiboa da, jaia lokalizatua egon dadin eta autorik ez hartzeko erreztasunak jarri nahi izan direlarik”, gaineratu dute omenaldiko antolatzaile taldekoek.
Kontxako irabazleen omeneko festa
- 11:00etan. Bandera eskaintzea Guadalupeko santutegian.
- 12:00etatik aurrera animazioa Portuan Abiyuan fanfarrearekin. Banderarekin argazkia ateratzeko aukera izango da Azerin elkartearen kanpoaldean.
- 14:30etik aurrera. Herri bazkaria kai berrian. Postretan, omenaldia.
- Bazkalostean. Festa Kanu DJarekin. Bi txozna izango dira.
- 21:00etatik aurrera. Aristi DJa kirol kaiko tabernetan. Ondoren, Truck diskotekak ateak irekiko ditu, doan.
