Zola itxurako grabatuak egiten ikasiko dute Errenteria-Oreretan
Zolagrafia tailerra antolatu du Errenteria-Oreretako Irrien Lagunen klubak, hurrengo larunbaterako, hilak 23. Tailerra haurrei zuzenduta dago, eta bertan zola itxurako grabatuak egiten ikasiko dute. Ekintza 16:00etatik 18:30era egingo dute Koldo Mitxelena plazan.
Irrien Lagunen Klubak aurreratu duenez, oraingoan haurren sen artistikoa landu nahi dute. Grabatu horiek linolioz egingo dituzte. Material plastikoa da, eta “zola formarekin erabiliko dute haur eta gurasoek gero grabatuak egiteko”.
Izena emateko azken eguna, hilak 15
Tailerra dohainik da, eta gehienez 80 haurrek hartu ahal izango dute parte. Ekintza 4-12 urteko haurrei zuzenduta dago. Horrenbestez, aurretik izena eman beharko da oarsoirriak[abildua]gmail.com helbidera idatzita. Izena ostirala baino lehen, hilak 15, eman beharko da.
Irrien Lagunen klubak aurreratu duenez, haurrak gutxienez, guraso batekin joan beharko dira, “familia giroa zaintzeko”. Horrez gain, arropa zaharra eta haurren merienda eramateko eskatu dute. Era berean, ekintzan zehar begiraleak egongo direla jakinarazi dute.
