Iokin Sagarzazu hondarribiarra brontze Europako Judo Kopan
Helduen Mailako Europako Judoko Superkopa egin zuten asteburuan Malagan (Andaluzia, Espainia) eta Iokin Sagarzazu judoka hondarribiarrak brontzezko domina lortu zuen 60 kilotik beherako pisuan. Bernard Azinovic kroaziarraren kontrako borrokan irabazi zuen brontzea.
Txapelketako lehen bi borrokak gainditu zituen Sagarzazuk, James Martin britaniarraren eta Joaquin Gomis espainiarraren kontra. Finalerdietan, baina, Makhir Gasanov erusiarrak ippon bidez menderatu zuen hondarribiarra eta finaletik kanpo geratu zen. Brontzea lortzeko lehian Azinovic kroaziarra baino gehiago izan zen Sagarzazu eta ippon batez lortu zuen domina.
Olinpiar jokoei begira
Sagarzazu, Valencia Terra i Mar taldeko kirolaria da. 2011 urtera arte herriko Ama Guadalupekoa taldean lehiatu zen baina unibertsitate garaira iritsita Valentziara joan zen, Euskal Herrian ez bezala, goi mailako entrenamentuak eta ikasketak uztartzeko aukera izaten dutelako judokek han. Ama Guadalupekoan zegoela, Espainiako Txapelketak irabazi zituen beheko maila guztietan.
Aurten, nagusien Espainiako Txapelketan, brontzezko domina lortu zuen Alcobendasen (Madril), ukabileko minagatik txapelketa behar bezala prestatu ez zuen arren. Joaquin Gomis madrildarra izan zen urrea, hain justu Malagan bigarren borrokan Sagarzazuk gainditu zuen judoka.
Denboraldi hau oso garrantzitsua da Sagarzazurentzat. 2014ko maiatzaren 26an olinpiar jokoetarako sailkapen garaia hasiko da eta hondarribiarraren pisuan, -60 kiloetan, lehiakortasun handia dago. Kirolari asko ariko dira borrokan 2016an Rio Janeiron lehiatzeko aukeraren bila.
