Uliako Murgita kala aztertu eta garbituko dute
Uliako Murgita kala aztertu eta garbitzeko deialdia egin du Itsas Gela elkarteak. Urtero legez, Azterkosta programan parte hartzen ari da itsas ondarearen ikerketa, kontserbazio eta difusioan lan egiten duen elkarte pasaitarra. Hilaren 17an, igandea, 09:00etan irten eta 13:00ak bitartean ariko dira lanean Ulian. Jarduera egiteko materiala bertan banatuko dute. Parte hartzeko aldez aurretik eman behar da izena, 619 814 225 telefono zenbakira deituta edota info@itsasgela.org helbidera idatzita. Garraioa izena ematen duten pertsonen arabera antolatuko dute.
Azterkosta
Azterkosta edo Coastwach egitasmoa, itsas bazterrari buruzko Europako Ingurumen Hezkuntza programaren Euskal Autonomia Erkidegorako egokitzapena da. Europako proiektua laurogeigarren hamarkadaren amaiera aldera sortu zen Irlandan, eta EAEn 1992 urtez geroztik dago indarrean. Azterkosta itsasbazterraren berezitasunak ezagutarazten, arazoak jakinarazten eta gizartea kostaldeko gune naturalak babesteko beharraz kontzientziatzen lagundu nahi duen tresna da. Testuinguru horretan, Itsas Gela elkarteak Pasaiako itsas ingurumenaren eskola izanik, Jaizkibel eta Uliako itsasbazterrak aztertzen dihardu 2003. urteaz geroztik. Uraren laginak hartu eta kostaldea aztertu nahiz garbitzeko txangoak antolatzen ditu urtero, urritik abendura bitartean.
