Gaur egin dute agerraldia AHTaren kontrakoek Irunen
Nafarroako presidente Yolanda Barcinari opilak botatzeagatik auzipetuta dauden lau lagunen kontrako prozesua “bertan behera uzteko” eskatu du gaur Irungo AHTaren kontrako taldeak. Tren lasterraren aurkakoek uste dute “injustizia penalaren osagarri guztiak” biltzen dituela epaiketak, “Espainiako Auzitegi Nazionala bezalako salbuespenezko auzitegi batez baliatzen delako desobedientzia soziala kriminalizatzeko”. Hori salatzeko hainbat ekimen antolatu dituzte, Irunen eta Euskal Herri Mailan. Hortaz, hilaren 18an hasiko den prozesuan 5 eta 9 urte arteko espetxe zigorrak eskatzen dituzte lau auzipetuen kontra —tartean Ibon Gartzia lezoarra—. AHTaren kontrako kideek zehaztu dute “mundu mailan” ez dela horrelakorik izan, “agintarien kontra horrelakoak izan direnean ez delako inongo prozesurik abiatu. Gehien jota isunak izan dira”, eta horren adibidetzat jarri dituzte Bill Gates-ek, Nicolas Sarkozyk edo Helmut Kohl-ek jasandako antzeko erasoak.
Tartalariek euren protesta ekintza 2011ko urriaren 27an egin zuten, Okzitaniako Tolosan. Yolanda Barcinari tartak bota zizkioten hiru ekintzailek. Une horretan horien kontrako deus ez zuen egin Frantziako Poliziak ez inork. Ekintza egin zutenak Nafarroara itzuli zirenean, ordea, bertako Foru Poliziak hiru ekintzaileak atxilotu, eta aurrerago ekintzaren berri emateko egin zen agerraldi batean hizlari izan zenetako bat ere atxilotu zuten. Horiek guztiak auzipetu zituzten.
Irungo AHTaren kontrako taldeko kideen arabera, ordea, AHTaren “eta gainerako azpiegitura erraldoi eta txikitzaileen behar gabeziaz eta kaltegarritasunaz jabetzeko” balio dezala epaiketak nahi dute, “ekologia arloan suntsitzailea eta ekonomikoki porrot egin duen egitasmoa da. Lurrari eraso, energia xahutu, zarata arazo larriak sortu, hipermugikortasuna areagotu eta herri txiki nahiz hiri ertainen kaltetan lurraldea hirigune handietan are gehiago zentralizatzera datorren garraiobidea da AHT”.
Zentzu horretan, “Irungo agintarien ekinbide garapenzalea” bertan behera geldi dadila eskatu dute, “lurraldearen suntsiketan” oinarritzen delako: “AHT bezalako garraio azpiegituren alde egiten du udalak, nahiz honek desoreka ekologiko, ekonomiko eta sozialak sortu”. Horrela, hiriko tren eremuaren berrantolaketa “espekulatiboa” dela uste dute, “herritarrok ez dugu berreskuratuko espazio hori. Bulegoek, merkatal lokalek, garajeek eta merkatalgune erraldoi batek irundarron bizitzaren merkantilizazioa eta motorizazioa areagotuko lukete”.
