Enpresen estrategia bateratzeko eta sustatzeko Irun On marka aurkeztu dute
Irunek duen aldatzeko izaera eta estrategia enpresariala bateratzeko, Irun On marka sortu dute hirian. Hala, enpresen jarduera eta jarrera berritzaileen izpirituari so egitea da Irun On-en xedea, enpresa horientzako erraztasunak emanez. Finean, ekonomia aktibatzeko plana da marka horren atzean dagoena.
Udala dago markaren sortzean. Lana sortzeko eta garapen ekonomikoa gauzatzeko ekimenak egin behar direla uste du, tartean Irun On, “enpresen garapenean eta berriak ezartzen lagunduko duelako. Benetan sinesten dugu enpresen dinamizazioak inbertsio berriak erakartzen dituela, bai eta daudenak lagundu”, esan du Jose Antonio Santano alkateak. Hala, I. Irun Ekintzan Sariak horren osagarri direla esan du alkateak; Irunen lantoki edota egoitza duten enpresa berritzaile eta pertsona ekintzaileak saritu nahi dituzte horrekin.
Hiri bat, marka bat. Horretan sakondu nahi izan du alkateak: “Definitzen gaituzten ezaugarriak zein diren jakin behar dugu, zerk ezberdintzen gaituen jakin behar dugu, lehiakorrago eta erakargarriago zerk egiten gaituen jakiteko”. Alkatearen arabera, Irunek baditu ezaugarri propioak, aurrera egiteko gaitasuna du, “alertan egoten badakigu, on moduan, euskaraz esaten den bezala on, ona, ondo. Irun gai internazionalen leiho izatea nahi dugu, eta Euskadiko hiririk internazionalenean bilakatu”.
Datozen egunetan jakinaraziko dituzte Irun On-en barruan egingo diren ekintzak. Urtarrilean Irun On tailerrak egingo dituzte.
