Maite Peña EAJko bozeramailea
Jose Manuel Herzog PPko bozeramailea.
GHZ, zaborrak, ura eta bertakoentzako TAO zergak bere horretan mantentzea adostu dute Errenteria-Oreretako PSE-EEk, EAJ eta PPren udal taldeek. Era berean, merkatari eta ostalariei zoru publikoa erabiltzeagatik ezartzen zaien zerga eta zilindrada gutxiko autoei dagokiena ere izoztea erabaki dute. Gaur goizean egin dute batzarra, eta oposizioaren adostasuna nagusitu da.
Batzarraren ondoren, EAJ eta PPk akordioaren berri eman dute, bakoitzak bere aldetik. EAJ izan da lehenengoa. Hala, Maite Peña EAJko bozeramaileak nabarmendu du udalak KPIren araberako igoera aplikatuta baino 100.000 euro gutxiago jasoko lituzkeela, baina aurrekontua 46 milioi eurokoak direla kontuan hartuta jasotzeari utziko zaion hori beste toki batetik “zuzendu” ahal izango dela esan du. “Udalari ez lioke horrenbeste eragingo, baina bai familiei”. Gainontzeko tasei %1eko igoera aplikatzea erabaki dute, KPIren azpitik.
Bestalde, 700 eurotik beherako diru sarrerak dituzten alargunekin salbuespenak egin ditzaten lortzeko hartutako konpromisoa ere kontuan hartzekoa dela esan du Peñak. Azkenik, etxe hutsen GHZren gainkargaren ildotik, salbuespen gehiago lortu dituztela gaineratu du.
Azkenik, “harrigarria” dela iritzi dio “Bildu bezalako koalizioa batek, bere burua ezkertiartzat duenak”, oposizioko alderdiek egindako proposamenak kritikatzea “alderdikoiak” direla aldarrikatuz. Zentzu horretan, oposizioak egindako lanaren garrantzia aipatu du, “bestela, ez zen ordenantzarik izango”.
Karga fiskal eta zorpetzearen harira
PPk, bere aldetik “karga fiskal eta zorpetzearen igoera saihestuz”, kontu publikoak gastua eutsiz biribiltzeko intentzioa agertu du Jose Manuel Herzog bozeramailearen bitartez. Ildo horretatik, EAJrekin bat egin duela adierazi du, PPk iritzi baitio zergadunak nahikoa astinduta daudela eta ez daudela zerga igoerarekin kargatzeko moduan. PSE-EErekin, berriz, beste ideia batean egin du bat, ez dela garaia “kanpo agentzietara jotzeko”.
Azkenik, oposizioak “talde lana” egin duela nabarmendu du Herzogek.
